Gonzalo Llamedo gana'l primer concursu #andanciulliterariu

Iniciativa pol Asturianu ta acabante d’anunciar el fallu del concursu #andanciulliterariu de creaciones en Twitter con temática sobre la cuarentena que tamos viviendo por cuenta l’estáu d’alarma pola pandemia de COVID-19. El ganador ye'l profesor de la Universidá d'Uviéu Gonzalo Llamedo por ‘Y agora col presente dormíu’.

El profesor Fonsu Martín Sánchez y la escritora María Luz Pontón conformaron el xuráu d’esti concursu, con Iván Llera, presidente d’Iniciativa pol Asturianu, como secretariu, ensin derechu a votu. Llamedo llevó’l primer premiu, mentes que Xuan Miyar quedó segundu con ‘La ñube metía..." y Ataúlfo Gamonal, terceru con ‘Dende'l primer día’.

La organización valora la participación nel concursu y agradez “la difusión y collaboración de los y les internautes na campaña nestos momentos d’andanciu de coronavirus”. D’igual forma rescampla “el trabayu de los y les participantes pa siguir creando lliteratura n’asturianu nestos momentos de tar en casa, xenerando un ambiente positivu y de distracción”.

La entrega de los premios, consistentes en llotes de llibru, va facese depués de que se resuelva la crisis sanitaria actual.

Y agora, col presente dormíu
y el fornu emocional encesu
ocúrresemos cocinar la señardá:
poner semeyes al bañu maría,
recuperar hestories de farina
feches bola cuantayá;
amasalo otra vuelta,
fincar los deos.
Pero la llevadura
echao a destiempu
yá nun xube.#andanciulliterariu

— Gonzalo Llamedo Pandiella (@LlamedoGonzalo) April 6, 2020

La ñube metía ente los cuatro murios que ñublen la so mente inocente.
Tiempos de rexes invisibles nes xaules coles cadenes nes puertes, onde namás hai, pel suelu, xuguetes.
Xuega a dar blinquinos delantre la ventana.#andanciulliterariu

— Xuan Miyar (@xuanmiyar) April 11, 2020

Dende'l primer día pósase un glayu na antoxana y déxame una fueyina: ayeri carbayu, güey xabú, mañana...
Naguo pol ramín d'olivar.#andanciulliterariu

— Ataúlfo Gamonal (@llobunoble) April 8, 2020