Gonzalo G. Barreñada va tar nos talleres de llectura de Corvera

Va falar colos presentes de la so novela 'La hestoria ensin contar', que se desendolca nel imaxinariu Burgundu de la posguerra.

Gonzalo González Barreñada va participar como convidáu nel Taller de Llectura n'Asturianu de Corvera qu'entama la Casa de la Llingua. Va ser mañana, a les 18 hores nel Centru Sociocultural de Les Vegues, nuna sesión na que los llectores van poder conocer de primer mano detalles sobre esta obra y sobre'l mundu d'esti pueblu de la cuenca minera que yá trabayara l'autor en 'La casa de Xuan Buelga' y en 'Hestories de Burgundu'.

Na redolada d'esti llugar apaecen na nieve unes buelgues misterioses. Ye al traviés de Pachu, un neñu qu'a lo poco de veles queda sordu, cómo descubriremos l'orixe de les mesmes y de la traición que vivieron unos fugaos.