Gonzalo G. Barreñada recibe tamién el XXI Premiu de la Crítica de poesía con ‘El llar n’orde’

|
Gonzalo G. Barreñada

Esti miércoles fallóse’l XXI Premiu de la Crítica de l’Asociación d’Escritores d’Asturies na modalidá de poesía. Na estaya d’asturianu'l xuráu decidióse por ‘El llar n’orde’ de Gonzalo González Barreñada, XXV Premiu Xuan María Acebal, como meyor títulu editáu nel 2020.

Los encargaos de decidir tanto’l merecedor d’esti gallardón como’l de castellanu, los poetes Aurelio González Ovies, Juan Ignacio González, Aida Fernández Escudero y Ánxel Álvarez Llano, con María Esther García López, presidenta de la Asociación d’Escritores d’Asturies, como secretaria, valoraron “una voz mui personal, capaz de trescender les esperiencies personales en motivos universales, al tiempu que llogra recrear un microcosmos poéticu a partir de situaciones cotidianes”. ‘El llar n’orde’ (Trabe), reconocíu nos Premios Lliterarios del 2019, ye’l tercer llibru de poemes del autor de Sotrondio, que l’añu pasáu asoleyó la novela ‘La hestoria ensin contar’, tamién cola editorial uvieína.

En llingua castellana, mentes, resultó escoyíu’l títulu ‘El aliento del Klai’ (Huerga y Fierro Editories) d’Alejandro Céspedes. “Una obra de vivencies personales cola capacidá de convertise n’esperiencies coleutives. Una poesía qu’estrái guapura y emoción del dolor y de la ferocidá de la realidá. Un llibru que dexa de manifiestu la función reparadora del versu, con sabia combinación de metros y imáxenes”, rescampla’l xuráu.

Adolfo Camilo, en narrativa

N’avientu diose a conocer el ganador na modalidá de narrativa n’asturianu, que resultó ser Adolfo Camilo Díaz pola so obra ‘Skull City y otres histories’ (Trabe), mentes que ta pendiente de fallase la estaya en castellanu. En columna periódistica va ser premiada Ana Paz Paredes, y el XVI Premiu de les Lletres d'Asturies, que reconoz una trayeutoria, ye p’Amelia Valcárcel.

Na semeya, Barreñada na gala de los Premios Lliterarios del 2019.

Contador Estadistiques