Gonzali Producciones va sacar a la venta un DVD especial de ‘La nueche de los muertos vivientes’

Pa primeros de febreru ta previsto que tea a disposición del públicu una edición especial de ‘La nueche de los muertos vivientes’. El DVD inclúi dellos estres xunto con esti clásicu de George A. Romero, too dafechu n’asturianu.

 

Según anuncia Gonzali Producciones, tres la finalización del doblaxe d’esta edición especial, ta trabayándose agora na posproducción pa mandar el trabayu a fábrica lo más pronto posible y ponelu a la venta pa primeros de febreru. El DVD, amás de la versión n’asturianu de ‘La nueche de los muertos vivientes (Night of the living dead)’, inclúi un documental sobre’l cine de temática ‘zombie’, delles entrevistes, imáxenes del doblaxe y la película 'White zombie (La lexón de los homes ensin alma)’, la primera na historia del xéneru, en versión orixinal retulada na nuesa llingua.

 

Antón Caamaño encargóse de la direición d’esti proyeutu que desendolcose nel Estudiu Fase Cuatru. Los actores encargaos de poner voz a los personaxes foron Carlos Novoa (llocutor de radio), Ana Díaz Morán (Bárbola), Ana Blanco (Helen), Fernando Marrot (Cooper), Caamaño (Bent), Carlos Alba (Tom) y Cristobal Ruitiña (presentador de televisión), amás d’Alberto Álvarez Peña, Arantxa Fernández, Norberto Sánchez, Hugo García y Illán Gonzali, encargáu tamién de la posproducción.