Gonzali Producciones pon a la venta’l DVD del western ‘McLintock’

Los asturianos y asturianes yá pueden disfrutar nes sos cases de la película ‘McLintock’ n’asturianu. Gonzali Producciones presenta’l xueves en Xixón el DVD d’esti western, a la venta en dellos comercios del país dende esta selmana.
 
Protagonizada por John Wayne y Maureen O’Hara, y dirixida por Andrew V. McLaglen, ‘McLintock’ ye un trabayu de doblaxe de Gonzali Producciones que yá pudo vese en dellos centros de cultura del país y qu’agora ta a disposición del públicu en DVD. Con un repartu conformáu por Antón Caamaño –que tamién fixo de direutor–, Mayra Fernández, Fernando Marrot, Eladio Sánchez, Arantxa Fernández, Carlos Alba, Norberto Sánchez, Ana Díaz Morán, Carlos Novoa, Fernando de Luxán, Alberto Álvarez Peña, Rodrigo Alba, Armando Felgueroso, Inma Rodríguez, Carlos González, Ruth González, Marcos Nogueiro, Hugo García, I.G. González, Marisa López Diz, Jéssica de la Paz y Carlos Rodríguez, conviértese d’esta forma na tercera qu’esta productora en crecimientu pon a la venta tres ‘El tercer home’ y ‘Los viaxes de Gulliver’.
 
La presentación del DVD va tener llugar esti xueves nel xixonés Centru Municipal Integráu de L’Arena a partir de les 19 hores, actu entamáu pola Asociación Cultural L’Arribada tres el que va proyeutase la película. Les persones interesaes en mercar esti productu nuevu del catálogu de Gonzali Producciones van poder facelo en Toma 3 y Paradiso (Xixón), El Corte Inglés Salesas (Uviéu), El Peldañu y Pallabres de Carambelu (Candás) y La Regenta (Corvera).