Los aficionaos asturianos al cine yá pueden disfrutar en casa del doblaxe al asturianu de ‘La nueche de los muertos vivientes’. Gonzali Producciones ta acabante de poner a la venta un DVD especial de la película qu’inclúi dellos estres.
Asina, amás de la versión asturiana d’esti clásicu del cine de terror rodáu nel 1968 por George A. Romero, los compradores tamién pueden disfrutar d’un documental sobre’l cine de temática ‘zombie’, delles entrevistes, imáxenes del doblaxe y la película ‘White zombie (La lexón de los homes ensin alma)’, la primera na historia del xéneru, en versión orixinal retulada na nuesa llingua. Antón Caamaño encargóse de la direición d’esti proyeutu que desendolcose nel Estudiu Fase Cuatru. Los actores encargaos de poner voz a los personaxes foron Carlos Novoa (llocutor de radio), Ana Díaz Morán (Bárbola), Ana Blanco (Helen), Fernando Marrot (Cooper), Caamaño (Bent), Carlos Alba (Tom) y Cristobal Ruitiña (presentador de televisión), amás d’Alberto Álvarez Peña, Arantxa Fernández, Norberto Sánchez, Hugo García y Illán Gonzali, encargáu tamién de la posproducción.
Con esta incorporación al catálogu de Gonzali Producciones, los asturianos yá tienen a la so disposición cuatro DVD con clásicos del cine doblaos na nuesa llingua: ‘El tercer home’, ‘Los viaxes de Gulliver’, ‘McLintock’ y ‘La nueche de los muertos vivientes’. Les ventes d’estos DVD ente’l públicu asturianu ta siendo un ésito, como demuestra’l fechu de que la productora tuviese que reponer esistencies nos meses últimos en delles ocasiones nos puntos de venta habituales.
Adxuntu | Tamañu |
---|---|
![]() | 163.45 KB |