Gonzali Producciones convoca un casting de voces pa doblaxes pa TPA

La empresa Gonzali Producciones tien en marcha un casting col oxetivu de crear un bancu de voces pa doblaxes futuros al asturianu pa la TPA. El perfil buscáu ye’l de persones con esperiencia en llocución o doblaxe, adultos y neños.

Nuna primer fase, hasta’l 7 de marzu, van recoyese currículos y muestres d’audio –tamién de videu– de llocuciones o doblaxes fechos pa, una vegada realizada una seleición, dar entamu a una segunda con presencia nel estudiu. La intención de la empresa responsable de la versión asturiana de ‘El rostru impenetrable (One-eyed Jacks)’, emitida na TPA en Navidá con ésitu d’audiencia y récor de reproducciones na web de la canal (42.560 a fecha de güei), ye la de crear un bancu de voces, tanto masculines como femenines y infantiles, p’afrontar iniciatives de doblaxe al asturianu pal ente públicu de comunicación.

D’igual forma, Gonzali Producciones quier qu’estes propuestes de versionáu sían preséu pa otros proyeutos de doblaxe, tanto n’asturianu como en castellanu, y de llocución de documentales, ficción o publicidá. Les persones que quieran participar nel casting pa formar parte del bancu de voces de la empresa han d’unviar los sos datos, currículu y muestres d’audio a la direición doblaxe@gonzaliproducciones.net.