Gonzali Producciones entama un casting pal doblaxe al asturianu de ‘Dirty Harry’

‘Harry el Suciu’ va ser la próxima película doblada al asturianu que va emitir la TPA tres l’ésitu d’audiencia de ‘El rostru impenetrable (One-eyed Jacks)’. Gonzali Producciones va entamar un casting de voces pa esti clásicu del cine protagonizáu por Clint Eastwood el llunes y el martes.

La prueba va desendolcase nel estudiu xixonés Fase Cuatro, asitiáu na cai Pachín de Melás númberu 42, n’horariu de 10 a 14 hores y de 16 a 20 hores. Nella pueden participar les persones qu'aportaron datos nuna primera fase desarrollada en marzu d'esti añu, al igual qu'aquellos que tengan interés nel proyeutu. Éstos últimos han de dirixise al corréu electrónicu doblaxe-harryelsuciu@gonzaliproducciones.net aportando lo sos datos de contautu y el currículu. Dende la productora encamienten tamién a incluyir muestres d’audio o videu nos qu’apaeza la so voz en llocuciones o doblaxes fechos, amás de señalar qué horariu vien-y meyor pal casting. La empresa valora la esperiencia en doblaxe y llocución, asina como'l conocimientu de la llingua asturiana y la capacidá d'espresase nesti idioma.

Les persones seleiciones participarán nel procesu del doblaxe a la llingua asturiana de ‘Dirty Harry’, película de producción estauxunidense dirixida nel 1971 por Don Siegel y protagonizada por Eastwood. Na película, Harry Callahan (Eastwood) ye un policía que se crió na cai y que recible’l nome de ‘Harry el Suciu’ por parte de los sos propios compañeros polos métodos particulares qu'emplega na llucha contra'l crime y por encargase siempre de los trabayos más desagradables. Tres la muerte de dos persones por parte d’un francotirador, Harry encargaráse de resolver el casu. Cola so interpretación y carisma, Eastwood contribuyó a perfacer un personaxe que diba convertise n'iconu. Mentes, el so antagonista en pantalla, Andy Robinson, protagonizó a  ún de los psicópates más famosos de la historia del cine.

Refugu d’otres propuestes

‘Harry el suciu’ conviértese asina na película nueva pola que TPA apuesta pa doblar al asturianu. Nun primer momentu, Gonzali Producciones propunxera los títulos 'Julie y Julia', 'Tolos homes del presidente' y 'L'amor tien dos cares (The mirror has two faces)', poniendo en marcha una encuesta en Facebook que ganó ‘Tolos homes del presidente’, pero la canal pública ve más percorríu al thriller policiacu d’Eastwood. Otra manera, la productora anunció que nel mes viniente va finar col doblaxe de los nueve primeros capítulos del clásicu d'animación ‘Superman’.