Gonzali abandona’l Partido Popular pol alloñamientu de la formación con respeuto al “lliberalismu social, de progresu y asturianista”

El proceder del Partido Popular (PP) n’Asturies y Xixón, alloñáu “d'esi lliberalismu social, de progresu y asturianista, fondamente democráticu, que non pocos militantes díbemos propugnando”, lleva a Humberto Gonzali a abandonar la militancia. L'escritor y xestor cultural presentó la baxa’l sábadu.

Nuna carta pública asoleyada minutos depués de treslladar a los órganos del partíu la so renuncia a la presidencia de la comisión de Cultura y a la representación na Fundación Municipal de Cultura, Educación y Universidá Popular –qu’exercía dende’l 2005– y nel Conseyu Asesor de la Llingua Asturiana, y facer el trámite p’abandonar la militancia, esplicaba les razones que-y llevaron a tomar esta decisión tres 21 años nel PP. “Soi lliberal y soi asturianu y, poro, creo dafechu que la democracia ye l'espaciu natural del lliberalismu, y que l'amor a tolo que na nuestra tierra pue defininos como lo que somos ye la esencia del asturianismu. El Partíu Popular, n'Asturies y en Xixón, perdecidióse por un proceder que lu allueña pasu ente pasu d'esi lliberalismu social, de progresu y asturianista, fondamente democráticu, que non pocos militantes díbemos propugnando. Y non, nun me ye posible, entós, ser lliberal refugando la democracia nin asturianu despreciando al asturianismu”, afirmó.

Gonzali apuntó qu’estes más de dos décades nel partíu lideráu anguaño n’Asturies por Mercedes Fernández “foi un tiempu de facer políticu apináu, como toa obra humana, de satisfacciones y desaliendu, de llogros que pusieron en valir l'emperru nos principios y d'esfuerzos balderos o apostalgaos. Foi un tiempu de convivencia nun partíu que me dexa amigos y la conocencia de persones válides y preparaes enforma pa la xestión de los intereses xenerales. Y foi, tamién, tiempu onde les faltes d'una estructura política y el nun s'afacer a la realidá social espeyáronse de toes toes de manera repetida”. Por último, deseyó al PP “lo meyor, al pesar de que n'Asturies nun pudiera o nun quixera, como sí quixo y pudo n'otros llugares, ser referente de los que n'amor a la patria primera dedíquen-y a ésta pal so progresu los más grandes enfotos”, zarrando les llinies con unes pallabres de Gaspar Melchor de Xovellanos: “Almiro al que defende la verdá y sacrifícase poles sos idees, pero non a los que sacrifiquen a otros poles sos idees”.