González Rodríguez termina segundu nel ultra trail de l'Antártida

|

L'atleta xixonés algamó l'oxetivu de facer podiu y namái se vio superáu pol belga Kurt Alderweireldt nos 100 quilómetros de carrera.

Fernando González Rodríguez marcó un tiempu de 14 hores, 43 minutos y 8 segundos na Antarctic Ice Marathon &100k, ultra trail de más de 100 quilómetros pela Antártida que nesta ocasión se disputó con bones condiciones climatolóxiques, ensin aire y con una temperatura media de 10 graos baxo cero, según informó la organización. Pese a la bona marca, l'asturianu nun pudo llevase'l trunfu pola carrera espectacular que fixo Alderweireldt, que completó la carrera n'Union Glacier en namái 11 hores, 13 minutos y 53 segundos.

El terceru de la competición, na que los diez participantes llegaron a meta, foi'l francés Gilbert Summa (15:41:02), mientres que la única muyer participante, la hongkonesa Jennifer Cheung completó la carrera en 18 hores, 34 minutos y 54 segundo, marca que-y permitió ser sesta ex aequo col so compatriota, l'atleta ciegu Siu Wai Leung, del que fixo de guía.

Polu Norte, la última

Tres esta prueba, González Rodríguez ta a un pasu de completar el so oxetivu de correr ocho ultra trails de más de 100 quilómetros en tolos continentes. Pa ello falta-y facelo nel Polu Norte, fazaña que nun ye fácil de completar pola inesistencia d'una competición d'eses carauterístiques nel llugar, lo qu'obligaría al xixonés a facelo en solitariu, con un costu económicu importante.

Contador Estadistiques