González Riaño va contautar col PP pa “tener la mayor representación política posible” nel Día de les Lletres Asturianes

L’Academia de la Llingua Asturiana (ALLA) yá tien too preparao pa la celebración del XXXIX Día de les Lletres Asturianes el 4 de mayu, xornada na que van ser nomaes académiques Isabel Hevia y Margarita Fernández Mier. Xosé Antón González Riaño quier contar con “la mayor representación política posible” nel actu, incluyíu’l PP.

“Vamos facer un esfuerciu mui grande, yá lo tamos faciendo, por qu’haya la meyor y mayor representación política posible, fundamentalmente de les fuercies asitiaes dientro de la Xunta Xeneral del Principáu”, afirmó’l presidente de la institución académica, que destacó que va contautar personalmente col Partido Popular (PP) “pa qu’escuche los nuesos argumentos. Nós vamos siguir faciendo plantegamientos constitucionales, vamos siguir defendiendo l’aplicación de la Constitución n’Asturies nel tema cultural y, dende llueu, pa esa aplicación el Partido Popular ye fundamental”.

Nesi sen, recordó que persones representatives y de la executiva popular sí acuden con regularidá al actu académicu pol Día de les Lletres y confirmó, a entrugues de los periodistes presentes, que’l so deséu ye que la presidenta del partíu, Mercedes Fernández, tea presente nel Teatru Campoamor el 4 de mayu. “Voi falar col PP insistiendo nesi brinde y insistiendo tamién en que los plantegamientos de l’Academia son plantegamientos que busquen el mayor consensu posible sobre cómo tien que ser esa oficialidá”, col oxetivu final de que sume a dichu consensu.

“L’Academia tien una estratexa de tresmitir, argumentar, intentar convencer…, cola necesidá de solucionar el tema cultural n’Asturies, y tamos nuna época na que se dan condiciones pa qu’esa igua de la situación cultural pueda ser definitivamente vidable. Nun sé si hai que falar d’añu o d’esta época nun sentíu más ampliu, pero dende llueu tamos nel momentu nel que finalmente la cuestión de la oficialidá pue abordase y pue, dende’l nuesu puntu de vista, solucionase”, señaló González Riaño, que considera que “yá tenemos argumentos económicos, sociolóxicos, xurídicos… Mesmamente podemos falar d’un modelu d’oficialidá qu’Asturies necesita” que l’ALLA vieno perfilando nes décades últimes.

Dos muyeres como académiques

L’actu académicu pol Día de les Lletres va servir p’acoyer como académiques “a dos muyeres d’un valir esceicional”: la historiadora y profesora de la Universidá d’Uviéu na Facultá de Filosofía y Lletres, Margarita Fernández Mier; y la tamién profesora de la institución universitaria na Facultá de Formación del Profesoráu y Educación, pedagoga y socióloga, Isabel Hevia. “L’Academia de la Llingua Asturiana tenía yá dos historiadores d’un importante valir, los profesora Fernández Conde y Isabel Torrente, y Margarita Fernández Mier va ser la continuadora d’esos estudios que venceyen la historia cola filoloxía, fundamentalmente l’estudiu de los testos medievales y la presencia del asturianu nellos”, destacó.

Sobre la figura d’Hevia recordó los sos notables estudios de calter sociollingüísticu y socioeducativu y apuntó que “va xugar un papel mui importante na Academia porque va ser un poco la continuadora del trabayu en rellaición cola socioloxía del idioma que vien representando Francisco Llera Ramo”. “Tamos mui contentos por qu’estes dos persones, estes dos muyeres d’esti valir esceicional, vayan collaborar cola institución”, finó González Riaño.

Actuación de Nacho Vegas

El presidente de l’ALLA tamién destacó’l fechu de qu’esti Día de les Lletres va ser el primeru que tea nel cargu y, poro, nel que llea’l discursu institucional “nel que s’analiza la evolución de la situación llingüística a lo llargo del añu caberu”, onde avanzó que va tratar sobre la oficialidá del idioma, tan d’actualidá nestos meses. Tamién apuntó que nesta xornada va asoleyase’l númberu 34 de la revista ‘Lliteratura’, coordinada por Marta Mori, que va tar dedicada a la nueva poesía fecha n’asturianu.

No que se refier a l’actuación musical, la institución académica va contar nesta ocasión con Nacho Vegas que, xunto col Coru Al Altu la Lleva, va facer un repás al so repertoriu n’asturianu. “Dende va un añu él tien acotáu esti día p’amosar la so collaboración cola llingua asturiana nesti actu solemne del Teatru Campoamor”, añadió.

Na semeya, González Riaño y Santiago Fano, diseñador del cartelu del XXXIX Día de les Lletres Asturianes.