González Riaño pide a los partíos “un alcuerdu de mínimos sobre’l modelu xurídicu d’oficialización del asturianu y de la fala del Navia-Eo”

|
Xosé Antón González Riaño na XLI Día de les Lletres Asturianes

L’Academia de la Llingua Asturiana (ALLA), en boca del so presidente, Xosé Antón González Riaño, tornó a ufrise como “moderador pa contribuyir al llogru de la definitiva solución xurídica pa cola llingua d’Asturies”. Foi na Xunta Estraordinaria pol XLI Día de les Lletres Asturianes, a la qu’acudió’l presidente del país.

“La proteición a la llingua y la cultura asturianes necesita una política d’estáu, un pautu mayoritariu ente los partíos y la sociedá que fixe, definitivamente, el marcu xurídicu que necesitamos; esto ye, el modelu d’oficialidá que s’afaye a la nuesa realidá sociolóxica, sociollingüística y sociopolítica”, aseguró nel actu celebráu nel Aula Magna del Edificiu Históricu de la Universidá d’Uviéu, más curtiu de lo habitual y con aforu reducíu por cuenta la crisis sanitaria pola COVID-19. Ente’l públicu taben Adrián Barbón, presidente del Gobiernu; amás del presidente de la Xunta Xeneral, Marcelino Marcos; la conseyera de Cultura, Política Llingüística y Turismu, Berta Piñán; el direutor xeneral de Política Llingüística, Antón García; y los diputaos Noelia Macía (PSOE), Daniel Ripa (Podemos), Ángela Vallina (IX), Ovidio Zapico (IX) y Adrián Pumares (Foro), cola ausencia a última hora de Teresa Mallada (PP), que tenía previsto acudir.

“Equí tán representaes la mayor parte de les sensibilidaes polítiques asturianes”, apuntó González Riaño, que siguió señalando que “dende l’Academia lo que vos encamentamos ye qu’ente vós, ente toos –que repitió en dos ocasiones, faciendo énfasis–, busquéis con intelixencia y xenerosidá un alcuerdu de mínimos sobre’l modelu xurídicu d’oficialización del asturianu y de la fala del Navia-Eo. Un modelu que nun tien por qué replicar necesariamente al d’otres comunidaes, sinón que tien que buscar el so propiu axuste a lo qu’Asturies necesita y hasta onde Asturies quiera llegar”.

Nesi sen, tornó a ufrir a la institución académica como “moderador pa contribuyir al llogru de la definitiva solución xurídica pa cola llingua d’Asturies. Too ello na creyencia firme de que la llingua nun ye de naide n’esclusiva, nin de les izquierdes nin de les dereches. La llingua ye un patrimoniu cultural de tolos asturianos y asturianes que supieron caltenela a lo llargo de los sieglos hasta güei”.

Enantes punxera d’exemplu a Galicia como “bona amuesa d’un billingüismu social harmónica nel que tanto’l castellán como la llingua de la comunidá conviven pacífica y llealmente”. Un pueblu, el vecín, na que la oficialidá “foi la solución escoyida”, como marca la Constitución, con un “gran éxitu”.

Dos xeneraciones d’escritores

La situación actual pola COVID-19 nun foi obviada por González Riaño al entamu de la so intervención –“na Academia somos perfeutamente conscientes de que la esmolición de la xente y la urxencia social tán fixaes agora mesmo na superación de la crisis sanitaria y económica que nos arrodia– y, “darréu d’ello, esti actu nun tien el calter festivu y multitudinariu d’otros años”, esplicó. De siguío tuvo pallabres pa Pablo Rodríguez Medina, nuevu miembru correspondiente de la institución, y pa Xuan Xosé Sánchez Vicente, II Premiu Nacional de Lliteratura Asturiana.

“Tán asina representaes dos xeneraciones d’escritores qu’amuesen lo meyor de la creatividá que s’espresa en llingua d’Asturies y que son, en dalguna midida, trayeutories paraleles: dambos profesores y dambos escritores que dominen a la perfeición los xéneros lliterarios de la poesía, la novela y el teatru”, apuntó. Refirióse a Sánchez Vicente como “ún de los entamadores, quiciabes el más importante, d’una lliteratura asturiana actual que, encontándose nos clásicos, supo dexar de llau’l costumismu folclóricu p’asitiar a la nuesa creación lliteraria nel cumal qu’agora mesmo esfruta y qu’entama a ser reconocida y valorada polos estudiosos y especialistes de dientro y de fuera d’Asturies”.

Asina, añadió que “una trayeutoria lliteraria como la de Sánchez Vicente algame esti Premiu Nacional ye una cuestión de xusticia y un arguyu pa les nueses lletres y pa l’Academia de la Llingua Asturiana”. Y “la presencia ente nós” de Pablo Rodríguez Medina, “un aliendu más nuna institución que tien d’axuntar ente los sos miembros a lo más granible y dinámico de la creación lliteraria. Pablo ye yá un escritor de sonadía y un afalador del procesu de recuperación llingüística en tolos niveles. Dende llueu, l’Academia aguarda grandes coses d’él y persabemos que nun nos va deceicionar”.

Representación del ámbitu académicu, cultural, políticu y sindical

Amás de los representantes políticos presentes, citaos enantes –a los qu’habría de sumar al conceyal de Cultura, José Luis Costillas (Ciudadanos), y l’alcalde de Bimenes, Aitor García Corte (Asturianistes por Bimenes)–, la Xunta Estraordinaria tamién contó cola presencia de persones del ámbitu académicu, cultura y sindical. Asina, presenciaron l’actu que conduxo Sonia Avellaneda y que tuvo un entamu y pieslle musical col himnu del país a cargu del gaiteru César Gracia, el rector Santiago García Granda; el síndicu mayor Roberto Fernández Llera; l’alta inspectora d’Educación del Gobiernu d’España, Covadonga González García; el subdirector del RIDEA, Andrés Martínez Vega; la presidenta de la Xunta pola Defensa de la Llingua Asturiana (XDLA), María Xosé Martínez Día; el presidente d’Iniciativa pol Asturianu, Iván Llera; el secretariu xeneral de CC OO, José Manuel Zapico; el coordinador xeneral de USO, Juan Jorge Estrada; el secretariu xeneral de CSI, Daniel Herrero; y Xosé Lluis Colodrón, de SUATEA, ente otros.

Na semeya, González Riaño mientres la so intervención, con Sánchez Vicente sentáu detrás, y Marcos y Barbón nes primeres fileres.

Contador Estadistiques