González Riaño espera “una política llingüística de verdá” d’un equipu del que “nun hai dulda ente nós”

La Universidá Asturiana de Branu (UABRA) celebró’l pieslle oficial nun actu nel Paraninfu de la Universidá d’Uviéu nel que nun participó finalmente Antón García por nun cesar oficialmente Fernando Padilla nel cargu hasta medianueche. El presidente de l’Academia de la Llingua Asturiana (ALLA), Xosé Antón González Riaño, demandó al Gobiernu “una política llingüística de verdá”.

La presencia de Berta Piñán al frente de la Conseyería de Cultura, Política y Llingüística y Turismu, con Antón García pilotando la direición xeneral de Política Llingüística y Martín López-Vega la de Cultura y Patrimoniu, dan confianza a la institución académica, como dexó ver ayeri’l so máximu representante. “Nun hai dulda ente nós del so encontu”, espresó, pa depués solicitar “una política llingüística de verdé na ámbitu universitariu, nos medios de comunicación y nel ámbitu institucional”.

Dixo estes pallabres delantre de Fernando Padilla, hasta ayeri secretariu xeneral de Planificación Llingüística y Normalización, qu’escusó l’ausencia de Piñán nel actu. Tampoco nun tuvo García, el so socesor, a pesar de que tuviera l’ALLA anunciada la so presencia, por mor de que nun fora oficial el so nomamientu hasta la medianueche.

El presidente de l’ALLA destacó’l trabayu en comuña de trés instituciones –la que dirixe, la Universidá d’Uviéu y el Conceyu de Cangas del Narcea– pal desendolcu de la UABRA, afirmando que “ye la meyor amuesa de collaboración granible que recupera l’espíritu de la vieya y rellumante estensión universitaria”. D’igual forma recordó los avances daos pola institución universitaria, como la so presencia entes les 500 meyores del mundu según el ranking de Shanghai, y emponderó “el llabor hacia alantre del actual rectoráu, el más comprometíu cola dignificación de la llingua d’Asturies”.

Entrega de diplomes

El propiu rector, Santiago García Granda, encargóse de conducir el pieslle oficial de la UABRA nel Paraninfu énte la mayor parte de los cerca de los 100 alumnos que participaron en Cangas, amás de munchos profesores. Nesta ocasión impartiéronse trés llingüísticos (el ‘Cursu Elemental de Llingua Asturiana’, el ‘Cursu Avanzáu de Llingua Asturiana’ y el ‘Curso de Gallego-asturiano’ na so primeira fase) y trés d'afondamientu cultural y llingüísticu (‘Capacitación pa la traducción al asturianu’, ‘El patrimoniu cultural asturianu. Un averamientu dende l’enguedeyu de lo tanxible y lo intanxible’ y ‘De la lletra al testu: taller d’escritura creativa’) ente’l 29 de xunetu y el 9 d’agostu en Cangas del Narcea.

Tres la entrega de diplomes llegó’l momentu de les intervenciones de les persones que presidieron la mesa del actu. Nella, amás de García Granda, González Riaño y Padilla tuvieron María Cristina Valdés, direutora de la UABRA –tamién se sentó’l secretariu de la mesma, Xosé Ramón Iglesias Cueva–, y Laura Álvarez García, teniente d'alcalde de Cangas.

Valdés, qu’ayeri vivía tamién el so día últimu como direutora xeneral de direutora xeneral d'Universidaes y Investigación, aseguró que “la UABRA foi un ésitu, y nun ye por desaxerar”, y calificóla como “una ufierta formativa única, una esperiencia vital pal profesoráu y l’alumnáu qu’ayuda a tresmitir y afondar nel conocimientu de la llingua asturiana, y un espaciu de compromisu personal y ideolóxicu”. Pela so parte, Álvarez García, destacó la importancia de los cursos pa “la divulgación y dignificación de las nuesas ḷḷinguas” y amosó’l compromisu de Cangas “na promoción y normalización” del asturianu.

El direutor xeneral de Planificación Llingüística y Normalización felicitó a los participantes na UABRA, “na mayor parte xente mozo”, pol so interés “na dignificación de la llingua asturiana” a pesar de la esistencia de “movimientos minoritarios” qu’entamen campañes con amplia repercusión mediática contraries al idioma. Zarró l’actu García Granda, que recordó tolos avances fechos na normalización del asturianu na Universidá d’Uviéu nestos trés años como rector pa depués señalar que “nun ye abondo. Hai que siguir caminando nesta direición y proponenos retos nuevos”.