González ve necesario un cambiu nel modelu actual de la Selmana de les Lletres por "quedar superáu"

La conseyera d’Educación, Cultura y Deporte, Ana González, anunció’l martes nel Parllamentu asturianu los sos planes pa esta llexislatura. Ente ellos ta un cambiu nel modelu de la Selmana de les Lletres, ensin entrar en detalles.
 
Na so intervención, González espresó la so voluntá de "mantener lo algamao y avanzar" na promoción de la llingua asturiana. Asina, amás de la celebración en Xixón del Festival Liet International, dedicáu a la canción en llingües minorizaes del continente, y d’otres midíes venceyaes cola toponimia o l’usu institucional del asturianu, anunció que va rediseñar la Selmana de les Lletres, una cita que, al so xuiciu, col pasu los años, caltiénse "fiel a un modelu que quedó superáu".
 
Tamién destacó la intención de la so conseyería de convertir al Centru Niemeyer nel “gran centru d’exhibición artística d’Asturies”, amás de consolidar el papel de LABoral Centru d’Arte y Creación Industrial como difusor de les corrientes artístiques de vanguardia. Otra manera, manifestó que esta “llexislatura será la de la consolidación del Muséu Arqueolóxicu d’Asturies y del Centru d’Arte Rupestre Tito Bustillo", y avanzó que ‘l so equipu considera "prioritaria" l’apertura de l’ampliación del Muséu de Belles Artes d’Asturies, un equipamientu que, xunto col Arqueolóxicu, conformará l’epicentru de la nomada ‘Mazana de los museos’, un complexu que xuniría los equipamientos esistentes n’Uviéu y que, al mesmu tiempu, articularía la ufierta museística del país.
 
Nel ámbitu deportivu, la conseyería consolidará la rede actual d’equipamientos. Amás, desarrollará un Plan d’Instalaciones Deportives y un programa d’usu d’estos equipamientos nos centros universitarios. El fomentu del deporte dientro del coleutivu de persones con discapacidá y la consolidación de la Escuela del Deporte d’Avilés como centru coordinador de la formación de téunicos futuros, serán otres de les llinies principales d’actuación.