González remarcó nun conceyu cola XDLA la negativa del so grupu políticu a la oficialidá del idioma

Representantes de la Xunta pola Defensa de la Llingua Asturiana (XDLA) aconceyaron el llunes con Ana González. La conseyera d’Educación, Cultural y Deporte remarcó la negativa del so grupu políticu a la oficialidá de la llingua asturiana.

Ésta foi una de les primeres afirmaciones que fixo González a Carlos Pulgar, Xosé Candel y Llucía Menéndez, representantes de la XDLA presentes nel aconceyamientu, nel que tamién acudieron en compañía de la conseyera la direutora xeneral de Política Llingüística, Ana Fueyo, y l’asesor téunicu docente de Llingua Asturiana na Educación, Xosé Lluis Remis. La responsable d’Educación, Cultura y Deporte sí reiteró’l so compromisu de cumplir cola creación de la especialidá d’asturianu, recoyíu nel programa eleutoral de la FSA-PSOE, anque ensin concretar fecha –“a lo llargo d’esta llexislatura”–, y foi receptiva a la inclusión de la Llingua Asturiana nel currículu d’Infantil, en procesu d’ellaboración y aprobación. D’igual forma, los representantes de la XDLA solicitaron a González que “s'informe de manera efeutiva a tolos centros sobre l'aplicación ineludible de la sentencia xudicial qu’elimina la ratio mínima pa impartir Llingua Asturiana en Secundaria” y una interpretación “recta” de la Llei d’Usu y Promoción del Asturianu “pa minimizar el descensu xabaz de matriculaciones nel pasu de Primaria a Secundaria”.

La continuación de los trabayos de la Xunta Asesora de Toponimia, col oxetivu de completar la oficialización de la toponimia de tolos conceyos d'Asturies, ye otru llabor que la conseyera y direutora xeneral de Política Llingüística dixeron que diben en poner en marcha yá. D’igual forma, aseguraron tar en contautu col direutor de la RTPA, Antonio Virgili, “cola intención d'afalar el cumplimientu de la toponimia oficializada nos diferentes espacios y tamién, pa impulsar la presencia na programación de conteníos deportivos, informativos y de ficción n'asturianu”, según espliquen dende la XDLA.

La organización cívica de defensa del idioma criticó la negativa dafechu a la oficialidá remarcada por González, “porfiando, otra vuelta, na discriminación d’una parte de la sociedá asturiana, y dexando bien a les clares les actitúes antidemocrátiques del partíu que representa, que fai oyíos sordos a los mandaos internacionales qu’encamienten la reconocencia del idioma, asina como la llexislación vixente”. La XDLA tamién quier “llamar l'atención de que tres más de cien díes de gobiernu, nun se conoz l’adopción de nenguna midida en materia llingüística y, endagora, sólo podemos falar de la disposición d’esti Gobiernu a solventar aquellos procesos yá entamaos, pero qu’en nengún casu suponen la planificación d’una serie de midíes coherentes que sienten les bases d’una normalización social de la llingua autóctona que vengan a superar los déficits nes funciones sociales del asturianu”.T

El Topu Fartón, en San Mateo

Esti vienres principien les fiestes de San Mateo d'Uviéu, nes que va tar presente un añu más El Topu Fartón. El chiringuitu entamáu pola XDLA xunto con Xega y SOS Racismu va asitiase nel so llugar habitual pa divertir a los uviedinos y visitantes.