González nun va tar presente na entrega de los Premios Lliterarios

El paraninfu de la Univesidá d’Uviéu va acoyer esti vienres la entrega de los Premios Lliterarios 2013. La conseyera Ana González va ausentase un añu más del actu, yá que va participar na inauguración del espaciu nuevu d’una galería.

D’esta forma, va ser el viceconseyeru de Cultura y Deporte, Alejandro Calvo, en compañía de la direutora xeneral de Política Llingüística, Ana Fueyo, l’encargáu d’entregar los gallardones más importantes de la lliteratura asturiana. Nesta ocasión, los escritores premiaos son Marisa López Diz, con ‘Tatuaxes nel corazón’, VI Premiu María Xosefa Canellada de lliteratura infantil y xuvenil; Ricardo Candás, con ‘Superficie de silenciu’, XIX Premiu Xuan María Acebal de poesía; Alfonso Zapico, con ‘Cuadernos d’Ítaca, V Premiu Alfonso Iglesias de cómic; Beatriz R. Viado, con ‘Yá cuasi nunca lo facemos por amor. Conciencies mercenaries’, XIX Premiu Máximo Fuertes Acevedo d’ensayu; y Pablo Rodríguez Medina, con ‘Fame d’amor, determín de pasión’, XXXIV Premiu Xosefa Xovellanos de novela.

L’actu va principiar a les 20 hores nel paraninfu de la Universidá d’Uviéu y va contar cola participación del músicu Héctor Braga. Según l’axenda de la conseyera d’Educación, Cultura y Deporte, a esa mesma hora va tar en Xixón na inauguración del espaciu nuevu de la Galería Espacio Líquido, eventu que principia a les 19.30 hores y que va completar cola visita a la esposición ‘Las propiedades extrañas’ de Milena Bonilla y Fran Meana.