González afirma que va insistir al Gobiernu estatal na reconocencia de la especialidá

|

La conseyera d'Educación, Cultura y Deporte, Ana González, aseguró na mañana del llunes mientres la presentación de la la dixitalización del catastru del Marqués de la Ensenada correspondiente a los conceyos de Somiedu y Teberga, que va insistir al Gobiernu estatal na reconocencia de la especialidá de Llingua Asturiana y Gallego-asturiano. "Nun vamos tirar la toballa", afirmó.

“Vamos siguir con delles estratexes. La primer d’elles ye que si ellos nun la reconocen, teniendo como tienen la competencia, que me digan que d’alcuerdu con qué llexislación pue facelo la conseyería”, apuntó. Na so intervención tamién se refirió al pidimientu de l’Academia de la Llingua Asturiana (ALLA) d’una defensa en Madrid de la especialidá docente de Llingua Asturiana y Gallego-asturiano “al máximu nivel y col mayor de los convencimientos si realmente queremos que salga p’alantre”, en pallabres de la presidenta Ana María Cano pola ausencia de la conseyera na Conferencia Sectorial de Educación del miércoles pasáu de la conseyera, de viaxe representativu per Estaos Xuníos: “munches vegaes la escenografía nun indica el puxu, nin la seriedá de les coses”, señaló.

González ye partidaria de conocer nun primer pasu les razones de la negativa y forciar al Ministeriu d'Educación, Cultura y Deporte a qu'una u otra alministración desendolque la especialidá. “Nun ye competencia de la comunidá autónoma, y si la competencia ye de mio, que m’indiquen en qué norma s’indica que ye de la mio competencia y desendolcaréla; y si non, volveré a pidi-yos qu’exerzan la so competencia”, añadió. Por último, nun descartó un posible “refugu ideolóxicu” a la especialidá por parte del PP, faciendo referencia al votu en contra de los populares a una moción presentada por IX al respeuto na sesión del 21 de payares na Xunta Xeneral, siendo l’únicu grupu que nun l’apoyó.

Contador Estadistiques