Gómez Romano viaxa a Santiago pa conocer la Estratexia Galicia Retorna

La direutora xeneral d'Emigración y Polítiques de Retornu trabaya na ellaboración del plan Retornu Asturies pa facilitar la vuelta al país d'emigrantes y de los sos descendientes.

Olaya Gómez Romano desplazóse a Santiago de Compostela p'aconceyar col secretario xeral da Emigración de Galicia, Antonio Rodríguez Miranda, y cola subdirectora de Retorno da Secretaría Xeral da Emigración, Begoña Solís. El motivu, compartir col territoriu vecín les esperiencies en polítiques de retornu, que tienen como exa central la Estratexia Galicia Retorna.

Los datos d'esta iniciativa afiten que 28.000 gallegues y gallegos residentes nel esterior tornaron a Galicia nel periodu nel que se punxo en marcha, del 2018 al 2022, lo que llevó al Gobiernu gallegu a facer una ampliación de la mesma. "El nuesu oxetivu ye qu'esti documentu, qu'inclúi 100 midíes tresversales y específiques d'apoyu al retornu de tola Alministración gallega, facilite'l regresu de 30.000 gallegos más", treslladó Rodríguez Miranda a Gómez Romano, una manera de "compensar el saldu vexetativu negativu".

La periodista consideró "mui fructíferu" l'alcuentru de trabayu, que-y permitió "compartir esperiencies y poner en común les iniciatives de les dos comunidaes en materia d'emigración, afondando nel retu del retornu". Presidencia, que xestiona les polítiques d'emigración, va poner en marcha nesta llexislatura la Oficina del Retornu p'asesorar de forma integral, social, llaboral, económica y alministrativamente a les asturianes y asturianos nel esterior que quieran tornar.