Gobiernu y autónomos van participar nun espaciu de diálogu pa encarar la situación del sector

El Gobiernu va poner en marcha en setiembre la Mesa del Autónomu, un espaciu de diálogu nel que s'encare la situación del sector y se desenvuelvan iniciatives de mancomún. Va tar integrada por ocho miembros, cuatro de la conseyería y otros tantos de les asociaciones d'autónomos.

Francisco Blanco, conseyeru d'Emplegu, Industria y Turismu fixo l'anuncia ayeri nel marcu del Día del Autónomu na Feria Internacional de Muestres d'Asturies (FIDMA), onde acudió xunto col director xeneral d'Innovación y Emprendimientu, Francisco Delgado. Ellí sorrayó la importancia d'esti coleutivu, que supón más del 21 por cientu de los afiliaos a la Seguridá Social nel país, y apuntó que'l Gobiernu sofítalu con ayudes superiores a los 2,5 millones d'euros.

Mientres la so intervención, el conseyeru valoró, amás, l'importante papel d'ayuda que desempeñen l'Institutu de Desenvolvimientu Económicu del Principáu (Idepa), qu'anguaño incorporó a los autónomos a la convocatoria del cheque de la innovación, que permanez abierta hasta setiembre y dispón d'un presupuestu de 500.000 euros. Tamién recordó que la Sociedá de Garantía Recíproca (Asturgar) cuenta con un itinerariu de financiamientu pa esti coleutivu y que la Sociedá de Promoción Esterior del Principáu (Asturex) ufiérta-yos sofitu por que puedan aportar a mercaos esteriores.