Gobiernu, empresarios, CC.OO y UXT sellen el 'pactu social'

El presidente del Gobiernu, José Luis Rodríguez Zapatero y los máximos dirixentes de los sindicatos mayoritarios y los empresarios, firmaron nel Palaciu de la Moncloa l'acuerdu qu'inclúi, ente otres coses, la reforma del sistema de pensiones.

L'acuerdu firmólu'l mesmu Zapatero, el ministru de Trabayu y Inmigración, Valeriano Gómez, el presidente de CEOE, Juan Rosell, el presidente de Cepyme, Jesús Terciado, y los secretarios xenerales de CC.OO. y UXT, Ignacio Fernández Toxo y Cándido Méndez, respectivamente.
  
La firma prodúxose nel Salón de Tapices del Palaciu de la Moncloa, onde tamién se firmaron los Pactos de la Moncloa y otros acuerdos sociales, como'l pactu antiterrorista.
  
L'actu tamién contó cola presencia de los trés vicepresidentes del Executivu, Alfredo Pérez Rubalcaba, Elena Salgado y Manuel Chaves, el d'Industria, Miguel Sebastián, el de la Presidencia, Ramón Jáuregui, y la ministra de Ciencia y Innovación, Cristina Garmendia.
  
L'acuerdu, que pivota alredior de la reforma de pensiones, abarca tamién les polítiques actives d'empléu, la negociación colectiva, la función pública, la política industrial, la política enerxética y la d'I+D.
  
Cola firma del mesmu, el Gobiernu algamó reactivar el diálogu social rotu dende'l pasáu branu y pretende agora llograr l'apoyu de tolos grupos nel Parlamentu cola confianza de llograr un gran acuerdu pa facer frente a la crisis.