Gerardo Díaz, premiu “Padre Patac” d’investigación

L'historiador de Gozón Gerardo Díaz Quirós ye'l ganador del prestixosu Premiu "Padre Patac" d'investigación na so XII edición pol so trabayu sobre arte sacru centráu nos trabayos del taller del artesanu Félix Granda Buylla.

Doctor n'Historia del Arte pola Universidá d'Uviéu, el trabayu pol que Gerardo díaz Quirós ganó esti premiu que fai alcordanza del desapaecíu intelectual xesuita, ye una parte del so trabayu de tesis doctoral, nel qu'analiza la vida y obra de Félix Granda Buylla, artesanu facedor d'imáxenes relixoses nacíu en L.lena y asitiáu en Madrid y que foi responsable, ente otres imáxenes, del trípticu de la Virxe de Cuadonga o de los interiores de la Ilesia de Tomás de Cantorbery d'Avilés.

Gerardo Díaz Quirós ye una de les persones más comprometíes col patrimoniu históricu asturianu, siendo conocíu poles sos declaraciones públiques crítiques colos poderes públicos en cuestiones rellacionaes cola conservación de monumentos y polítiques de patrimoniu. Comisariu de la esposición "Les edaes del home" ye autor tamién de dellos estudios sobre arte popular asturianu.