Gaspar Meana lleva a la“Crónica de Leodegundo” el reináu de Ramiro I

El cómic historicista que recrea la dómina de la monarquía asturiana y qu'asoleya la editorial Llibros del Pexe llega yá al so XXIV episodiu, qu'asitia l'acción nel añu 850, cuando muerre'l Rei Ramiro.

Nel añu 1991 Gaspar Meana (1960) dio a imprenta'l cómic "La mesa de Salomón " (711-715) obra cola qu'entamaba la publicación de la impresionante obra d'esti artista xixonés sobre la época del reinu asturianu. Asoleyada en llingua asturiana, la obra de Gaspar asitia la evolución del reinu asturianu dientro d'una revesosa trama d'intrigues palaciegues qu'amiesta ficción y realidá, too ello garrando'l puntu de partida de la imaxinaria crónica de los fechos escrita pol monxu benedictín Leodegundo a primeros del sieglu X.

La crónica de Leodegundo cunta la hestoria del noble visigodu Liuva, asitiáu nes tierres del norte de la península tres de la derrota visigoda a manes de la tropa árabe de Tarik. La so persona ye l'arranque d'una saga familiar col tresfondu de la monarquía asturiana que s'ambienta principalmente n'escenarios asturianos pero que tamién lleva a los sos protagonistes pelos centros de poder del mundu naquel tiempu como Toledo, Roma, Aquisgrán, Córdoba, Bagdad o Constantinopla, toos espeyaos con un detallismu cuasimente fotográficu y tres d'un importante llabor de documentación.

Dempués de quince años, la Crónica de Leodegundo llega a los sos volúmenes XXIII y XXIV, qu'espeyen los últimos díes del reináu de Ramiro I. "Metratron n'Arabot" y "Xuiciu Final" son estes dos obres qu'edita, como tolos númberos anteriores, la casa "Llibros del Pexe" y que van presentase na llibrería de Xixón "Casa del libro" asitiada na Plaza d'Italia, esti xueves 6 d'abril a les 19:30h.