Gas baxo'l suelu asturianu

La multinacional Heritage Petroleum PLC, que yá tenía de va tiempu el preste del Gobiernu asturianu pa sacar alantre un proyectu d'estracción de gas nes cuenques mineres, dempués de más de dos meses a información pública nos que nun se recibió alegación nenguna, anunció esti mes l'entamu de los trabayos de prospección. El proyectu de la Heritage abarca diez conceyos nes cuenques del Nalón y Caudal, nos que na compañía quier estudiar la esistencia de de bolses de gas metanu arreyaos a antiguos pozos mineros.

La Heritage Petroleum ye una compañía especializada n'esplotar a baxu coste antigues mines y yacimientos de gas y petróleu abandonaos por ser poco rentables, como ye'l casu del proyectu que tienen na rexón del Niágara en Michigan (EEUU) Nun dexa de ser interesante conocer lo que pasa en Michigan sobre esta tema pa saber en que consiste esta clase de negociu y que ye a lo que se dediquen compañíes como esta, y lo primero que s'alcuentra ye que l'estáu ta acabante de prohibir esti mesmu mes proyectos pa sacar gas na fastera del lagu Michigan. Los riesgos d'esta actividá analícense nel informe (pa descargar en formatu pdf) Gas y petróleu nel lagu Michigan ¿paga la pena? una pregunta qu'igual habría que treslladar a Asturies. Más información nel web del Michigan Environmental Council