García López abre en 'Poétiques' l'actividá n'asturianu de la Feria del Libro de Xixón

Dellos puestos acueyen firmes d'autores na primer xornada de la sesta edición d'esta iniciativa que s'allarga hasta'l domingu.

La Feria del Libro de Xixón (FeLiX) arrancó esta mañana a les 11 hores cola apertura de les 57 casetes instalaes nel paséu de Begoña y na cai Tomás y Valiente, la cantidá más alta rexistrada, de les que 24 correspuende a llibreríes y 33 editoriales. Amás hai que sumar numberoses actividaes que se reperten ente les dos carpes instalaes, la Escuela de Comerciu y l'Antiguu Institutu.

La primera na que l'asturianu tien protagonismu va ser na estaya 'Poétiques', una actividá de María Esther García López col so llibru billingüe 'Amor y deséu en tiempos virales' (Ediciones Pata Negra). L'actu va celebrase a les 20.30 hores na Escuela de Comercio baxo la moderación d'Inaciu Galán y cola participación d'Enrique Tirador, creador de los grabaos del llibru; l'editor Fermín Santos; y el cantautor Chema Aladro.

Tamién en 'Poétiques' va haber eventos al rodiu de ‘Pexe les manes’ (Ediciones Trabe) de Milio Ureta (domingu 17.15 hores, Escuela de Comerciu) y de ‘Tayu’ (Ediciones Trabe) de Alejandro Fernández-Osorio (domingu 19 hores, carpa 1). Mentes, na estaya 'Disidencies/Testimoniu' van entamase alderiques ente Aitana Castaño y Pablo Rodríguez Medina (sábadu 12 hores, carpa 1) pola obra de la primera ‘Coses nuestres’ (La Cuenca del Nalón): d'Inaciu Galán y Marta Mori (domingu 13 hores, Escuela de Comerciu) centráu en ‘¡Volved las manos al bable! La llingua asturiana nel franquismu’ (Ediciones Trabe): de Xaime Martínez y Alejandro Basteiro (domingu 18 hores, patiu del Antiguu Institutu) sobre ‘La fuercia o les cuatro epifaníes de Martín Feito’ (Hoja de Lata); y de Sidoro Villa con Carlos González Espina (domingu a les 19.45 hores, carpa 2) al rodiu de ‘El fervinchu’ (Impronta).

Amás, el domingu a les 19.45 hores na Escuela de Comerciu va presentase ‘Fortuna’ (VTP Editorial), de Milio Rodríguez Cueto, obra ganadora del I Premiu de Novela Curtia Andrés Solar Santurio. Va conducir l'actu Paz Fonticiella. L’horariu d’apertura de les carpes, asitiaes nel paséu de Begoña y na cai Tomás y Valiente, va ser de 11 a 14.30 y de 17 a 21.30 hores, de güei al sábadu, y de 11 a 14.30 y de 17 a 20 hores, el domingu.

Primer xornada de firmes

Los llectores que s'averen a FeLiX van poder mercar los sos títulos preferíos y averase tamién a los sos autores gracies a les diferentes firmes qu'entamen les editoriales. Nesta primer xornada Impronta va contar con Aurelio González Ovies a les 18.30 hores con 'La ventana' y una hora depués con Alberto Vázquez con 'El sol na escombrera'; Radagast/Cuatro Gotes con Andrés Fernández, a les 19 hores, con '1809: Cartes de la Revolución de Trubia', y una hora depués con Marga Pedrayes con 'Baxo'l pumar'; Pintar-pintar con García López a les 19 hores con 'Musical-Landia', 'Menú de versos' y 'Deva y el pitín'; y Delallama a les 19.30 hores con David Castañón con 'Les farturrutes'.

Na imaxe, puestos abiertos esta mañana nel Paséu de Begoña. Semeya de la Feria del Libro de Xixón.