García Granda presenta la estructura del so equipu de gobiernu

El rector nuevu de la Universidá d'Uviéu, Santiago García Granda, presentó esti martes el so equipu de gobiernu, con una estructura qu'alza l'área d'Empresa al rangu de vicerrectoráu. Xabiel García Pañeda, delegáu de Coordinación y Estratexa Universitaria.

La presentación celebróse esta mañana nel Paraninfu del Edificiu Históricu. L'equipu de gobiernu respuende a criterios de paridá ente homes y muyeres y atiende tamién a la representación de les distintes disciplines de conocencia.

Ente ellos destaca la presencia de García Pañeda, collaborador d'Asturies.com. El profesor titular del Área d'Inxeniería Telemática ye coautor, xunto con Rubén Sánchez Antuña, del llibru 'Dos visiones asturianes de les nueves tecnoloxíes', editáu por Araz, empresa tamién editora d'esti diariu dixital.

La estructura de equipu de gobiernu de García Granda ye la siguiente:

• Vicerrector d'Organización Académica, Juan José del Coz Díaz (Área d'Inxeniería de la Construcción).
• Vicerrector d'Investigación, José Ramón Obeso (Área d'Ecoloxía)
• Vicerrector d'Estensión Universitaria y Proyección Internacional, Francisco José Borge López (Área de Filoloxía Inglesa).
• Vicerrectora d'Estudiantes, Elisa Miguélez González (Área de Microbioloxía).
• Vicerrectora de Recursos Materiales y Tecnolóxicos, Marta María Hernando Álvarez (Área de Tecnoloxía Electrónica).
• Vicerrectora d'Acción Tresversal y Cooperación cola Empresa, Eugenia Suárez Serrano (Área d'Organización d'Empreses).
• Secretaría Xeneral, Eva María Corderu González (Área de Derechu Financieru y Tributariu)
• Delegáu de Coordinación y Estratexa Universitaria, Xabiel García Pañeda (Área d'Inxeniería Telemática).