García Granda abre'l discursu de toma de posesión como rector n'asturianu

El caderalgu de Química Física citó a Einstein y recordó a la so familia emplegando la llingua asturiana. Afirmó que va impulsar la producción cultural n'asturianu, crear el SNL y potenciar la imaxe corporativa trillingüe de la universidá.

"Decía Albert Einstein que 'llocura ye facer lo mesmo una y otra  vegada y esperar resultaos diferentes' camudando’l protocolu voi aniciar el mio discursu en asturiano pa facer reconocimientu a lo más  importante que una persona tien na vida que ye la so familia. Gracies a  la mio madre, a la mio muyer, al mio fíu, a los mios hermanos y a los que ya nun tais con nos, pol vuestru sofitu y afeutu que fae posible que tea yo güei equí. Ya en castellán entamo col resto del discursu", comenzó Santiago García Granda'l so discursu de toma de posesión como rector n'asturianu celebrada ayeri nuna abarrotada Biblioteca Universitaria na que taba presente'l presidente del país, Javier Fernández, y el delegáu del Gobiernu estatal n'Asturies, Gabino de Lorenzo, ente otres munches autoridaes.

El de Verdicio fixo tamién más alantre referencia al idioma al referise al compromisu de la Universidá d'Uviéu "cola sociedá, con Asturies", señalando, nesta ocasión en castellanu, que "l'impulsu a la lliteratura, el cine, el teatru y la música en llingua asturiana van ser claves nel nuesu mandatu onde vamos crear la Oficina Universitaria de Normalización Llingüística y vamos potenciar la imaxe corporativa trillingüe n'español, por supuesto, n'asturianu y n'inglés.

No que respeuta al restu del discursu, destacó que "queremos facer una universidá más tresparente, más dinámica y más cercana", y tamién "áxil, moderna y activa". "Trabayaremos siempre pol interés xeneral, por una universidá pública y de calidá, actuando dende la responsabilidá y con una alministración eficiente, tratando d'axuntar les aspiraciones llexítimes de la comunidá universitaria".

Na semeya, García Granda y el rector saliente, Vicente Gotor.