García Cortina aspira a llevar el Mundial sub-23 de ruta en carretera de Doḥa

|
Iván García Cortina

El xixonés Iván García Cortina (Klein Constantia) lidera'l combináu estatal na prueba en ruta sub-23 d'esti xueves de los Mundiales de Ciclismu que se tán celebrando en Doḥa. El sábadu va competir la sierense Alicia González (Lointek) en categoría elite, completando asina la representación asturiana na capital qatarina.

El futuru corredor del Bahrain-Merida de Vincenzo Nibali, no que será’l so saltu al profesionalismu, ye’l xefe de files de la seleición de corredores fecha por Pascual Momparler y que completen el gallego Daniel López (Burgos-BH), el vascu Jon Irisarri (Caja Rural-Seguros RGA), l’aragonés Jaime Castrillo (Lizarte) y el madrilanu Gonzalo Serrano (Cartucho.es), que finó nel puestu 31 na prueba contrarreló del llunes a 2 minutos y 41 del ganador, l’alemán Marco Mathis (Rad-Net Rose). La salida de la carrera, que va ser televisada en direuto per Teledeporte, ta prevista pa mañana a les 12 hores –11 n'Asturies– pa facer un percorríu de 166 quilómetros pela isla artificial nomada ‘La Perla de Qatar’.

El sábadu, mentes, va ser el turnu de González, seleicionada por Ramón González Arrieta, que va competir xunto cola so compañera d’equipu Alba Teruel y Sheyla Gutiérrez (Cylance). La prueba va disputase a les les 12.45 hores –11.45 n'Asturies– y tamién va poder siguise per Teledeporte.

Contador Estadistiques