García Corte, convidáu en 'Alderiques d'Asturies'

L'alcalde de Bimenes va tar nel programa que s'emite en MuyMuy Televisión los sábados a les 19.30 hores al traviés del TDT y Telecable.

Aitor García Corte va falar de los sos primeros meses como alcalde, la situación del conceyu y de la Mancomunidá de La Sidra, y la declaración de la oficialidá, ente otros munchos temes. L'alcalde del Partíu Asturianista (PAS) ye'l segundu convidáu dientro d'esti formatu novedosu de 'Alderiques d'Asturies' na qu'amás del conductor Samuel Gradín, la persona entrevistada responde les entrugues de dos periodistes, nesti casu del redautor d'Asturies.com Pablo R. Guardado y d'Inaciu Galán.

'Alderiques d'Asturies' dio'l saltu recién a la televisión al traviés del canal MuyMuy Televisión, que s'emite na plataforma de cable Telecable y que tien cobertoria per TDT nos conceyos de Gozón, Carreño, Xixón, Villaviciosa y Colunga.