García Hoyuelos va presentar en Xixón ‘Se lo dije a la noche’, poemariu en toles llingües ibériques

L’escritor castellanu Juan Carlos García Hoyuelos va tar presente’l sábadu en Xixón convidáu por Iniciativa pol Asturianu pa presentar ‘Se lo dije a la noche’. Esta obra ye un proyeutu poéticu-musical qu’inclúi toles llingües ibériques.

‘Se lo dije a la noche’ trátase d’un trabayu nel que collaboraron dellos escritores y organismos, y que recueye 69 poesíes tornaes al portugués, gallegu, asturlleonés, castellanu, eusquera, aragonés, aranés, catalán, valencianu, murcianu, inglés, romaní y lladín, en reconocimientu a los sefardinos. Nel casu concretu del asturlleonés, na obra participen l’Academia de la Llingua Asturiana, Rubén d’Areñes, Xaviel Vilareyo y Roberto González-Quevedo, amás del Conceyu de Lleón, Amadeu Ferreira (presidente de l’Associaçon de la Lhéngua Mirandesa), Furmientu, el bercianu Xuaxús González, el salmantín José Benito Mateos Pascual y l’astorganu Enrique Soto.

La obra tamién inclúi un DVD con 30 cantares de dellos estilos en castellanu y nes llingües a les que foron tornaes, asina como 142 recitaciones, dalgunes musicales, que preceden a otres poesías de trabayos anteriores del escritor nacíu en Basauri y criáu en Burgos. Les persones que reciten n’asturlleonés son los asturianos Alfredo González, Roberto González-Quevedo, Próspero Morán, Anabel Santiago y el grupu musical Skanda. Per otres fasteres del idioma participen los mirandeses Bina Cangueiro y Amadeu Ferreria, el Conceyu de Lleón, el charru José Benito Mateos Pascual, la zamorana Patricia Otero Alonso y los lleoneses Enrique Soto y Alicia Valmaseda.

La intención del coleutivu que trabaya pola normalización del asturianu ye’l d’aprovechar la presencia de García Hoyuelos pa entamar un encuentru fraternal ente falantes d’asturlleonés. Asina, van participar escritores y artistes asturianos y lleoneses como Rubén d’Areñes, Javier Cayado, Javier Cubero, María Díaz Suárez, Inaciu Galán, Roberto González-Quevedo, Iván Llera Huerta, Charo Martínez Domínguez, Álex Ordiales, Anabel Santiago –que va actuar–, Denis Soria, Vítor Suárez y Alicia Valmaseda Merino. L’actu va tener llugar el sábadu, a les 20 hores, en La Cervecería del Millón de Ibus, asitiada na avenía Rufo García Rendueles (El Muru) númberu 7, na esquina con Emilio Tuya y Premiu Real. El 30 por cientu de les ventes va destinase a Iniciativa pol Asturianu.

Aconceyamientu cola Fundación Príncipe de Asturias

Inaciu Galán y Denis Soria, en representación del coleutivu que trabaya na normalización de la llingua asturiana, aconceyaron el vienres pasáu con Teresa Sanjurjo, direutora de la Fundación Príncipe de Asturias cola intención de solicitar a la institución l’usu de la llingua del país. Iniciativa pol Asturianu treslladó a Sanjurjo la situación sociollingüística d’Asturies y propunxo delles midíes coles que la Fundación “podría facer muncho pola normalización de la llingua asturiana y pol ameyoramientu del so prestixu social”. Ente elles destaca l’usu del asturianu na so páxina web, al igual que fai la Fundació Princep de Girona col catalán, amás de nes intervenciones de Felipe de Borbón y Grecia nes sos visites a Asturies, y de los miembros de la propia fundación.

Según señaló Iniciativa pol Asturianu nun comunicáu, la presidenta de la institución aseguró que’l tema llingüísticu ye daqué importante y que lleva tiempu “pensando na cuestión del usu del asturianu por parte de la Fundación”. Nesi sen esplicó que va despaciu, pero que quier “facer les coses bien”.