'Ganar la cai faciendo país' ye'l lema de los actos del Día de la Nación Asturiana previstos n'Uviéu

|
'Ganar la cai faciendo país' ye'l lema de los actos del Día de la Nación Asturiana previstos n'Uviéu

La iniciativa #LluchandoPolaSoberanía torna a entamar actividaes con motivu del Día de la Nación Asturiana. Asina, el 8 de setiembre va celebrase una manifestación peles cais d'Uviéu baxo'l lema 'Ganar la cai faciendo país', que va finar con un actu políticu y una xinta popular nun puntu del centru de la ciudá.

La intención de los convocantes ye contar pa esta xornada, que va completase con xuegos tradicionales y música del país, "con una representación plural d'estremaos movimientos que siguen puxando pola tresformación d'Asturies dende les cais y que-y dan osíxenu a milenta reivindicaciones que tienen que tar presentes nun día como ésti". #LluchandoPolaSoberanía tien previstu un conceyu abiertu nuevu de preparación del 8 de setiembre'l xueves 25 de magar les 20 hores nel Llar La Llegra.

Amás de los eventos propios del Día de la Nación Asturiana, na viéspora ta prevista nesi mesmu espaciu uviedín asitiáu n'El Postigu Baxu –n'horariu por confirmar– un alderique sobre "les perspeutives y el camín qu'habría siguir la izquierda soberanista nesti momentu políticu n'Asturies". Nel mesmu van ponese enriba la mesa les propuestes llanzaes na campaña desendolcada'l mes de xunu col lema 'Un pueblu en movimientu mirando al futuru', que busca axuntar fuercies dende la izquierda, construyir alternatives soberanistes y avanzar hacia un procesu constituyente asturianu.

Contador Estadistiques