Galicia estrena muséu de la mar

Esti fin de selmana inaugurose con una esposición sobre la batalla naval de Rande en 1702 el Muséu de la mar de Vigo. Los sos edificios, trabayu póstumu del arquitectu italianu Aldo Rossi, ocupen cerca d'una hectaria de tarrén, recuperando tamién elementos vieyos como les naves d'un antiguu mataderu, y cuenta con complementos como un embarcaderu propiu en que poder meter barcos históricos, un faru y xardinos con vexetación de costa. Con too ello, Galicia cuenta gracies a esta instalación con ún de los resortes culturales rellacionaos cola mar más importantes y con una política museística más activa de tola costa atlántica. Y yá que tamos con museos de la mar, nun podemos escaecer ún de los más importantes como ye'l Muséu de La Rochelle en Francia. L'históricu puertu galu ye noticia porque nos sos cais ta atracáu dende va cuatro años ún de los barcos más famosos del mundu como ye'l Calypso, base d'operaciones del desapaecíu oceanógrafu Jacques Cousteau. La histórica nave ta criando mofu y ferruñu dende que llegare al muséu de La Rochelle, onde se suponía que teníen que restaurala, pero el casu ye que naide nun miró por ella en tou esti tiempu. Sicasí, l'históricu dragamines de la II Guerra Mundial reconvertíu en barcu científicu niégase a morrer y parez que la ciudá americana de New Rochelle, hermanada cola Rochelle francesa, podría acoyer el barcu pa ponelu otra vez en condiciones.Anque Asturies ye país de mar, la única instalación semeyante a estos grandes museos marinos que tenemos, a muncha menor escala, ye'l Muséu de la mar de Lluanco, que nos dos años que lleva abiertu nun organizó mas qu'unes poques esposiciones temporales como la del aniversariu del Titanic y del que, tres los fastos inaugurales, poca más actividá xeneró, siendo anguaño ún de los museos menos conocíos tanto pol públicu asturianu como polque vien de fuera.