Gales celebra una consulta p’ampliar l’autogobiernu

Gales quier más pasos pal autogobiernu. Baxo la entruga “¿Quies que l'asamblea pueda facer lleis sobre toles cuestiones nes venti árees temátiques de les que tien competencia?” va haber un referéndum el 3 de marzu de 2011.

Esti yá ye’l tercer referéndum pa la devolución de poder fechu en Gales. El primeru foi en 1979, el segundu en 1997 y anguaño, Gales vien de presentar formalmente a Londres la propuesta d’una nueva consulta, qu’esperen qu’apruebe la secretaria d’Estáu por Gales, Cheryl Gillian,

Pel momentu, l’Asamblea de Gales tien competencia pa facer lleis sobre venti materies; sicasí, nun pue facer lleis sobre toles cuestiones, yá qu’hai temes nos que tien que pidir el preste del parllamentu británicu. Si’l resultáu del referéndum ye positivu, l’Asamblea va poder facer llibremente lleis sobre les venti materies, ente les que s’inclúin agricultura, salú, educación o gobiernu municipal.

Llaboristes y los nacionalistes del Plaid Cymru, que gobiernen conxuntamente en Gales, y los lliberales yá anunciaron que van facer campaña pol sí cuando se confirme la convocatoria oficial del referéndum. La composición actual del parllamentu galés ye de ventiséis diputaos llaboristes, catorce diputaos nacionalistes, trece conservadores, y seis diputaos lliberales.