Galán recibe nel Muséu Barjola el I Premiu Yolanda Huergo pa trabayos d’investigación n'asturianu

Esti vienres va tener llugar la entrega del I Premiu Yolanda Huergo pa trabayos d’investigación n’asturianu qu’entama l’asociación Grana, n’Alcordanza de Yolanda Huergo nun actu nel xixonés Muséu Barjola que va contar con una pequeña actuación musical de Xel Pereda. El ganador foi Inaciu Galán y González, que presentó la obra ‘Los cuartos propios de la lliteratura asturiana: una conversación colectiva’.

Grana nació va poco más d’un añu pa promover el debate, l’intercambiu d’idees y la creación de conocimientu n’Asturies. Ye por ello que se marcaba como ún de los sos oxetivos primeros la convocatoria d’esti gallardón pa reconocer trabayos d’investigación de cualesquier ámbitu de conocimientu y llinia d’estudiu fechos o tornaos al asturianu.

Esti mes conocíase que’l merecedor d’esta primer edición yera Galán por un estudiu de la lliteratura fecha por muyeres que, como rescampló’l xuráu, contó con un gran cuidáu llingüísticu y estilísticu, y orixinalidá ne plantegamientu de la investigación. Ésti tuvo formáu pola editora y escritora Esther Prieto, el profesor d’Historia José Luis Carmona y el profesor de Filosofía Oliverio Martínez.

Nacíu en Xixón nel 1986, el ganador ye una persona bien conocida pola so gran actividá creativa y cultural. Miembru de l’Academia de la Llingua Asturiana (ALLA), doctor pola Universidá d’Uviéu, máster en Sociedá de la Información y el Conocimientu ena Universitat Oberta de Catalunya (UOC), gradáu en Periodismu pola Universidad a Distancia de Madrid (UDIMA) y diplomáu en Turismu y especialista en Xestión Cultural pola Universidá d’Uviéu, tien recibío dellos reconocimientos pol so llabor.

De calter biañal

La entrega del premiu, una obra de la escultora Carla Huergo y 1.500 euros, va tener llugar esta tarde a les 19 hores na primer planta del Barjola. L’actu va pesllase cola actuación de Xel Pereda.

Dau’l calter biañal del Premiu Yolanda Huergo, la segunda edición del mesmu va convocase nel añu 2025. Grana agradeció a tolos autores que participaron nesta edición y conviden a toles persones interesaes a unviar trabayos d’investigación pal concursu nuevu.

Na semeya, los miembros del xuráu Prieto, Carmona y Martínez xunto con Pablo R. Alonso, secretariu de Grana.