Galán lleva per séptima ocasión el Concursu de Monólogos Pepe Campo

El xuráu convocáu pola Sociedá Humanitarios de Samartín falló'l llunes la decimoctava edición.

El testu 'Nel tiempu l'andanciu' d'Inaciu Galán resultó ganador del XVIII Concursu de Monólogos Pepe Campo. Ye la séptima ocasión na que'l periodista y escritor xixonés lleva esti premiu, el primeru en comuña con Isaac García de l'Arada nel 2006 y l'últimu nel 2018.

Na tarde d'ayeri aconceyaron en Morea los responsables de decidir el monólogu merecedor d'esta edición. El xuráu tuvo compuestu por Pablo Xuan Manzano, en representación de l'Academia de la Llingua Asturiana; l'escritor y especialista en Llingua Asturiana, Ánxel Álvarez Llano; y la ganadora del añu pasáu con 'Somos unos repunantes', Aymara González Montoto, con Octavio Trapiella, de los Humanitarios, como secretariu.

El ganador del Pepe Campo lleva una recompensa de 300 euros, que se va entregar nel marcu de les XV Xornaes Culturales que tienen llugar en xunu n'alcordanza de Joaquín Rodríguez Muñiz. En concreto va ser el miércoles 15 a les 19 hores nel llar social nun actu nel que Galán va intepretar el monólogu.

Na semeya, Trapiella, Álvarez Llano, González Montoto y Manzano nun momentu del aconceyamientu d'ayeri pa decidir el ganador del Pepe Campo.