Galán va recibir el miércoles el X Premiu de Monólogos Pepe Campo

La Sociedá Humanitarios de Samartín ta celebrando les ‘VII Jornadas Culturales Joaquín Rodríguez Muñiz’. El miércoles, xornada dedicada a la memoria de Pepe Campo, Inaciu Galán va recibir el gallardón que lleva’l nome del poeta.

El xuráu del concursu escoyó’l testu ‘Yá llegó la Navidá’, de Galán, como’l merecedor de llevar el X Premiu de Monólogos Pepe Campo, certame bien importante pa la promoción y la renovación d'esti xéneru lliterariu y escénicu tan propiu d'Asturies. Ésta ye la cuarta edición que l’escritor xixonés resulta ganador d’esti gallardón que cuenta colos nomes de Carlos Alba ‘Cellero’, Benxa Pérez, Juan Antonio de Dios o ‘El Maestru’ nel so llistáu de vencedores.

L’actu d’entrega del premiu va celebrase’l miércoles, a les 19 hores, na de Casa Cultura de Morea. L’actor Lluis Antón González va encargase de representar el testu de Galán énte’l públicu presente, que tamién va poder disfrutar de l’actuación d’un grupu de músicos del Conservatoriu de Música d'Ayer. Otra manera, a lo llargo de la selmana son munches les actividaes programaes pola Sociedá Humanitarios de Samartín dientro de les sos xornaes culturales que dedica a la memoria del historiador Joaquín Rodríguez Muñiz. Ente elles destaca la entrega de los sestos gallardones ‘Colmena de oro’ a la solidaridá y ‘Espiga de Escanda de Oro’ a la tradición, que van recibir el vienres, a les 20 hores nel Teatru Cine Carmen, la Fundación Pequeño Deseo y Rincón Cunqueiru, de manera respeutiva. Mentes, nesi mesmu actu, José Antonio Ochoa Fernández, presidente de Calefacciones Farho, va recibir la medaya honorífica del coleutivu ayerán.