Galán lleva a Oxford la situación llegal anómala del asturianu

Inaciu Galán y González participa esti xueves nel XVI Forum for Iberian Studies: Cultural and Linguistic Diversity in the Iberian Peninsula que se celebra n’Oxford. L’escritor va falar de la situación d’anomalía llegal del asturianu.

Esta cita, que tien como sede la Facultá de Llingües Medievales y Modernes de la University of Oxford, en concreto la Taylor Institution, axunta a espertos en llingües ibériques de tol mundu, asina como a profesoráu y alumnáu de la institución. Mientres güei y mañana van dase delles conferencies sobre los idiomes peninsulares, con un güecu pal nuesu idioma. En concreto, Galán toca’l tema ‘L’asturianu: l’anomalía d’una llingua non oficial nun estáu plurillingüe’, charra que va dar en llingua asturiana con una torna en papel al inglés.

Nella esplica la situación llegal del asturianu, esto ye, una llingua ensin status d’oficialidá, apurriendo casos de discriminación, y fai un repás a la historia del idioma nos 30 años últimos. Na so cuenta de Twitter, Galán esplica que’l públicu amosó, tres la so intervención, un interés especial na situación del asturianu nes escueles.