Galán destaca la “disposición bona” de los diputaos en Madrid pa colos problemes del asturianu

|

El presidente d’Iniciativa pol Asturianu, Inaciu Galán, aconceyó en Madrid con tolos partíos políticos con representación por Asturies. L’escritor y periodista destacó la “disposición bona” de toos ellos pa colos problemes del idioma.

La tarde d’ayeri pa Galán foi intensa, con cuatro conceyos con diputaos asturianos en Madrid. La ronda d’entrevistes inauguróla’l socialista Antonio Trevín, que se comprometió a facer un siguimientu de la situación del idioma cola Llei Wert y del usu de la toponimia oficial asturiana por parte de Fomentu. Darréu, el presidente d’Iniciativa pol Asturianu reunióse coles populares Carmen Maniega y Ángeles Fernández-Ahuja, que tamién se mostraron receptives. Galán algamó de les dos diputaes del partíu nel Gobiernu’l compromisu de falar colos ministerios de Fomentu y d’Educación, Cultura y Deporte, pa tratar sobre los dos problemes principales qu’atopa anguaño la llingua asturiana, y a usar l’idioma n’actos públicos. Tamién vieron con bonos güeyos la posibilidá de buscar víes de financiación dende los Presupuestos del Estáu pa l’Academia de la Llingua Asturiana y pa la promoción del idioma, una demanda vieya d’Iniciativa pol Asturianu que paez tener consensu nos cuatro partíos que representen a Asturies en Madrid.

Gaspar Llamazares tamién quixo vese con Galán pese a que, nun principio, nun taba confirmada esta reunión. El parllamentariu d’Izquierda Xunida, que treslladó recién per escrito una entruga al Gobiernu estatal sobre si diba incorporar la materia de Llingua Asturiana y Gallego-asturianu al bloque d’asignatures d’especialidá, onde van tener güecu les llingües oficiales cola LOMCE, trató col escritor sobre esti asuntu y amosó’l so esmolecimientu sobre la situación del idioma. Zarró’l ciclu d’entrevistes Enrique Álvarez Sostres, representante únicu de Foro de Ciudadanos, qu’espuso’l programa del so partíu con respeuto al asturianu. Tamién aldericó con Galán sobre asuntos llexislativos.

“Foron too pallabres bones; tolos diputaos amosaron una disposición bona”, señaló’l presidente del coleutivu que trabaya pola normalización del idioma del país. “El nuesu oxetivu con estes reuniones yera abrir un diálogu que continúe nel futuru y, al mesmu tiempu, utilizales como ferramientes pa llevar al Estáu cuestiones importantes pal asturianu”, añadió Galán, qu’entiende que los diputaos asturianos tienen que ser “los voceros de la llingua asturiana” en Madrid. Amás, destacó’l fechu de que, en mayor o en menor midida, tolos políticos conocíen bien los problemes que tien anguaño l’idioma y que nengún punxera torgues pal alcuentru cuando n’Asturies la organización atopa dificultaes a la hora d’aconceyar con políticos de ciertes formaciones.

Na semeya, Galán posa xunto a Llamazares nel despachu del diputáu nel Congresu.

 

Contador Estadistiques