Gabino Busto Hevia gana’l VIII Manuel Nevado de microrrellatos mineros na so estaya d’asturianu

‘Chamiceruca’, de Gabino Busto Hevia, ye’l nome de la obra ganadora del VIII Concursu de Microrrellatos Mineros Manuel Nevado Madrid na so estaya d'asturianu. Dos histories d’Ánxel Nava lleváronse una mención especial.

Nesta edición del concursu dedicáu al históricu llíder mineru antifranquista qu’entama la Fundación Juan Muñiz Zapico, venceyada a Comisiones Obreres d’Asturies (CC OO), participaron un total de 161 microrrellatos procedentes de llugares tán llonxanos como México, Cuba, Honduras, Bolivia, Chile y Uruguái, y otros más cercanos como Holanda y Dinamarca. Toos ellos con una mesma temática que fai esti concursu únicu nel mundu: la mina.

El premiu al meyor microrrellato n’asturianu foi pa ‘Chamiceruca’, de Busto, que cuenta la historia d’una viuda de mineru qu’atopa un furacu nel monte con accesu a una veta de carbón poco enantes de qu’asocediera un accidente na mina del llugar. El xuráu compuestu pol caderalgu de lliteratura Benigno Delmiro Coto, que foi’l presidente; l’escritor Xulio Arbesú; Ana Alonso Cabrera, secretaria de Muyer y Cultura de CC OO d’Asturies; Marcelino Álvarez, presidente del CJPA; y la periodista Matu Fernández, tamién otorgó-y una mención especial a Ánxel Nava por ‘El castillete’ (dedicáu a Nel Amaro) y ‘El penitente’.

El primer premiu del Manuel Nevado viaxó a Castellón gracies al microrrellatu ‘La luz de emergencia’, d’Elia Dembilio Mezquita. Mentes, Ana Rodríguez Suárez llevóse l’áccesit mozu con ‘Una ilusión, un desaliento’; y Jesús Jiménez Reinaldo, el de téstimoniu históricu con ‘Una misión pedagógica’.