"Güeria" lo nuevo de La Col.lá Propinde

"Güeria" ye'l títulu del segundu trabayu del grupu de L.lena tres del anterior "L.l". El discu va estrenase'l día 29 d'avientu en Teatru Vital Aza de La Pola L.lena a les 20:00 hores, con entrada de baldre.

El repertoriu d'esti segundu trabayu, que llegar dos años depués d'aquel famosu "l.l" va ser continuista col espíritu de la banda, ufiertando folk-fusión con delles influyencies de reggae y otros estilos. "Güeria" ufierta 11 temes con dello de composición propio sobre temes tradicionales y dalguna pieza irlandesa adaptada al estilu de La Col.la Propinde, una banda que d'otra manera presenta cambeos d'importancia sobre la so formación orixinal que se concreten na entrada d'un nuevu cantante al grupu cola voz de "Lolo" y la collaboración de José Alberto Cano cola guitarra acústica, mientres que los demás puestos queden como taben, con Alex Domínguez de gaiteru y coros "Gelete" a la batería, Lluis Moro nel curdion y teclaos, David al baxu y David "el Cai" cola xiblata. Amás d'ello, "Güeria" cuenta coles collaboraciones de Lafu na guitarra eléctrica, les voces de Delfo (de La Tarrancha) Ramón Blanco (Los Berrones) y d'Esther Fonseca, Miguel Herrero cola trompeta y les percusiones de Sergio García.

"Güeria" que ye'l títulu tamién d'ún de los temes del discu, quier ser, según esplica'l grupu, homenaxe a la xente que vive nes zones rurales y trabaya na ganadería y agricultura.