Funde un barcu con galipote n'Alxecires

La costa del sur de la península ta convirtiéndose nun segundu escenariu de marees negres protagonizaes por barcos que raspien los topes de la llei. Ayeri un grupu d'activistes de Greenpeace abordaben un vieyu petroleru monocascu en Xibraltar, en denuncia de l'abondancia de barcos peligrosos que naveguen pel mundu y de la esistencia de llugares como Xibraltar, onde se dan de pasu les mayores irregularidaes en materia de seguranza naval, un fechu enforma grave cuando pel estrenchu pasa'l 10% del tráficu mundial de barcos. L'acción de protesta acabó como'l rosario l'aurora cuando la policía del peñón intervino y llevó pal cuartón lo mesmo a los que protestaben qu'a un garapiellu de periodistes que taben cubriendo la noticia.Esta mañana, como dando la razón a les crítiques de los ecoloxistes, El "Spabunker 4" un gabarrón que servía pa tresvasar fuel d'unos petroleros a otros, fundía enfrente d'Alxecires cuando carretaba cerca de mil tonelaes de derivaos del petroliu. Na parte del estrenchu trasiéguense tolos años más d'unos barcos a otros más de 4 millones y mediu de tonelaes de petroliu, lo que se conoz como "bunkering". Greenpeace denunció qu'esta ye una práctica peligrosa na que siempres se suelten restos a la mar y que se fai nun marcu de midíes de seguranza cásique inesistentes. La organización denuncia que la gabarra que foi a pique, propiedá de la compañía Ciresa Bunker S.A. (Grupo Boluda) yá soltó esti veranu 150 llitros de galipote durante una d'estes operaciones, provocando una mancha d'unos 100 x 30 metros qu'acabó emporcando una playa del conceyu.