Fuelga nel ferrocarril de vía estrencho

El ferrocarril de vía estrencha para güei les24 hores n'Asturies cola llegada a Siero ayeri de la marcha de trabayadores de FEVE que salió'l día 16 dende Bilbao y qu'esta tarde va rematar sobre les siete nuna manifestación n'Uviéu con final na Delegación de Gobiernu en reclamación d'un conveniu colectivu pa los emplegaos de la empresa estatal.

La empresa llegó a firmar un conveniu "d'eficacia llimitada" nel 2.002, pero esti namás contó cola firma d'un representante sindical de tolos que tan representaos. A la central vasca LAB faltó-y tiempu pa espulsar al delegáu que roblo aquel alcuerdu, que nunca nun tuvo validez pa los sindicatos. En franciendo la negociación, los sindicatos mayoritarios en FEVE (UGT, CCOO y CGT) entamaron esta marcha que lleva yá quince díes andando los más de 300 kilómetros de vía de tren ente Bilbao y Uviéu. Les reivindicaciones sindicales pasen per que se caltenga la consideración de l'antigüedá llaboral, un nuevu sistema de xornaes de trabayu y, nel terrén salarial, que se ponga la xuba prevista nos Presupuestos Xenerales del Estáu pol Ministeriu de Fomentu pa FEVE, finando d'esta manera colos trés años de conxelación salarial que se lleven na empresa, xusto desque s'abandonó la negociación pol conveniu.

El Tribunal Superior de Xusticia d'Asturies dio-yos esta selmana una rabasera d'aire fresco a los sindicatos al resolver una demanda interpuesta en payares na que se quexaben de que tres la firma del conveniu parcial con ELA, FEVE dedicóse a poner toles estorbises que pudo na negociación. La sentencia del TSXA, que la empresa yá dixo que va recurrir, ordena a la dirección de FEVE'l "cese inmediatu del comportamientu antisindical".

Feve tien más de dos mil trabayadores en plantiya, cerca de la metada n'Asturies, onde se concentren los talleres principales y les más de les llinies que xestiona esta entidá creada a primeros de los 70 cuando'l gobiernu de los últimos años del franquismu se fizo cargu de les llinies particulares de vía estrencha que daquella taben en quiebra pola crisis del carbón, tráficu del que dependíen.