Frixuelos, cultura y amor como respuesta al discursu del odiu

'Asturies de los Mios Amores y Non del so Odiu' ye una iniciativa de la mocedá asturiana énte la vista al país de Casado y Abascal.

L'Asamblea Moza d'Asturies (AMA) entama esta folixa pa "visibilizar l'amor, la diversidá, l'alegría y la cultura d'Asturies frente al odiu, la esclusión y la intolerancia que pregonen estos señores", en referencia a los líderes estatales del PP y VOX. "L'Asturies qu'amamos ye la del sieglu XXI, la qu'apuesta pola vida, y non la de los que busquen referentes del sieglu VIII porque nos quieren facer retroceder 13 sieglos en derechos y llibertaes", añade.

La cita ye mañana a les 18.30 hores na uvieína plaza del Paragües, una escoyeta non casual, porque "baxo esti paragües cabemos toes". "Asturies siempre foi, ye y será una tierra enllena de color, integradora y solidaria", aseguren dende esti coleutivu.

Nesi llugar va haber espaciu pa la música, con conciertos de Xosé Antón Fernández 'Ambás', Silvidos y Gemidos o les raperes QueenKongs; la poesía n'asturianu con Pablo Texón o María Esther García López; o talleres infantiles. Tamién pa coleutivos sociales, pensionistes, LGTBI, migrantes, vecinales o asociaciones feministas y de memoria histórica, ente otros, col oxetivu d'amosar "la riqueza y la diversidá de la sociedá asturiana".

Amás va entamase una Frixuelada Popular "pa demostrar lo arguyoses que tamos de la nuesa cultura a pesar de que Pablo Casado-y falte al respetu cada vez que vien".