Francisco González Zapico, delegáu nuevu del Gobiernu estatal n’Asturies

El Conseyu de Ministros aprobó esti vienres el nomamientu de Francisco González Zapico como delegáu nuevu del Gobiernu estatal n’Asturies. El sustitutu d’Antonio Trevín yera’l responsable del Área d’Agricultura y Pesca de la Delegación.
 
González Zapico, natural de Ciañu, ingresó na Alministración Xeneral del Estáu en marzu del 1971 nel Serviciu d’Estensión Agraria del Ministeriu d’Agricultura, Pesca y Alimentación. Inxenieru Téunicu Agrícola, foi diputáu por Asturies del 1982 a 1989; voceru d’Agricultura y Pesca nel Congresu de los Diputaos del 1983 al 1986; vicepresidente de la Comisión d’Agricultura y Pesca del 1986 al 1989; alcalde del Conceyu de Llangréu dende’l 1987 hasta’l 1995; y presidente de l’Asociación de Comarcas Mineras (ACOM-España).
 
Trevín dexa’l so puestu al frente de la Delegación, que garró’l 1 de mayu del 2004, porque va ser el candidatu del PSOE al Congresu por Asturies nes eleiciones del 20 de payares. Otra manera, el Conseyu de Ministros tamién nomó güei a José Manuel Pose Mesura como delegáu estatal del Gobiernu en Galicia.