Francida la negociación ente FSA y IX-BA-LV

La negociación ente FSA y IX-BA-LV llegó ayeri a un puntu de desalcuentru ensin torna posible al facese público qu'IX-BA-LV refugaba la propuesta el pautu de gobiernu que-y ofrecía la FSA y qu'acutaba pa la coalición les estayes de Vivienda, Bienestar Social y Xusticia, repartíes en trés conseyeríes, pero que nun dexaba güecu pa que la formación d'izquierdes tuviere competencies nes estayes de gobiernu de cultura y política llingüística nin nes de mediu ambiente y ordenación del territoriu.

Anque la formación qu'encabeza Jesús Iglesias diz que pue volver a negociase y afirma que la coalición nun quería más conseyeríes que les que tenía pero sí más competencies, al empar que sorraya que la falta d'alcuerdu tamién se debió a cuestiones de programa, fontes socialistes aseguraron que la negativa d'IX-BA-LV nun tien torna posible y que por ello ya se-y dio orden a Vicente Álvarez Areces pa que forme un gobiernu socialista que va tener qu'exercer les sos funciones sofitáu nuna mayoría relativa na Xunta Xeneral.