Francia aprueba xubir la edá de xubilación

|

L'Asamblea Nacional de Francia aprobó'l proyectu de llei pa reformar el sistema de pensiones que xeneró les fuelgues y protestes de les últimes selmanes por 336 votos a favor y 233 en contra.

Sicasí, la última palabra va tenela'l Conseyu Constitucional, dao que'l Partíu Socialista recurrió esti martes ante esti organismu'l testu del proyectu de llei, qu'eleva de 60 a 62 años la edá mínima de xubilación y de 65 a 67 la edá a partir de la qu'hai que xubilase pa recibir la pensión completa. Mientres el Conseyu Constitucional nun dea'l so vistu bonu al testu, non podrá promulgase la llei.
  
El Senáu yá aprobó esti martes el testu que consensuare un día antes la comisión paritaria integrada por siete diputaos y siete senadores. Raymond Soubie, asesor en temes sociales del presidente francés, Nicolas Sarkozy, afirmó'l pasáu domingu que la promulgación de la llei tendría que producise sobre'l próximu 15 de payares, teniendo en cuenta un posible recursu de la oposición.
  
Crítiques de la izquierda
Anque la mayoría de los diputaos aplaudieron al términu de la votación, dellos parllamentarios d'izquierdes urriáronla, según la emisora de radio France Info. La socialista Marisol Touraine denunció que "la gran reforma" tornó nuna iniciativa lexislativa "penosa".
  
"Suañabeis con una audacia reformadora y atopasteis con un país en crisis", añadió. Pa Jean-Paul Lecoq, del Partíu Comunista Francés, la reforma supón "una regresión social sin precedentes".
  
Opiniones de la derecha
Mientres, Jean Leonetti, de la Unión por un Movimientu Popular (UMP, el partíu del presidente Nicolas Sarkozy), dixo que l'aprobación de la reforma "nun ye nin una victoria de la mayoría sobre a la oposición nin la victoria del Parlamentu sobre la cai, sinón la victoria del interés xeneral".
  
Pela so parte, Jean-Luc Préel, de Nuevu Centru (centru-derecha), afirmó que llamenta que "el Gobiernu nun aprovechare esta llei pa llevar a cabu una verdadera reforma d'equidá", que consista en "un réxime universal únicu por puntos alministráu polos aliaos sociales" y en "la eliminación de los réximes especiales".
 

Contador Estadistiques