Fran Allegre autoedita una obra de teatru en llingua asturlleonesa

El músicu y artesanu lleonés Fran Allegre ye l’autor de ‘Sentir, y nun sentir sentire’, obra de teatru escrita na llingua común. Trátase d’una autoedición na que collaboró en delles cuestiones Faceira, asociación pola cultura de Lleón.

‘Sentir, y nun sentir sentire’ cuenta la historia “d'un pintor de cuadros con muncha sensibilidá con tolo del so alredor”, señala Allegre, con una trayeutoria autodidauta de 16 años ellaborando instrumentos tradicionales lleoneses y con trés espublizaciones n’Academia de la Llingua Asturiana y un poemariu asoleyáu, ‘Poemas pa nun ser lleídos’. El protagonista de la so última creción, que vive nun pueblu riberanu, “sufre pola belleza natural que desapaez y cuesta-y averase a la belleza femenina. Toles sos andances y ocurrencies vense trescalaes d’esto, de la dulda o l’inevitable ‘Sentir, y nun sentir sentire’”, esplica Allegre.

“Escrita al final d’una adolescencia que paez nun querer terminar, ye una obra ante too romántica”, añade l’escritor, que pretende presentar esti trabayu n’Asturies nos meses primeros del añu. Pa facer más cenciella la llectura a aquelles persones falantes de castellanu que s’averen a la obra, Allegre incorpora un pallabreru nel llibru.