Fraga inaugura unes xornaes sobre petróleu al día dempués de la catástrofe

Ironía macabra, el presidente de Galicia, Manuel Fraga, inaugura güei oficialmente les xornaes de l'Asociación Española de Operadores de Productos Petrolíferos, xusto el día dempués de la catástrofe del petroleru Prestige, que fundió ayeri pela tarde y reposa agora a 3.500 metros baxo l'agua, guardando dientro cerca de 70.000 tonelaes de fuel, el doble de lo que carretaba'l famosu Exxon Valdez, qu'emporcó la costa d'Alaska nel 89. Anque la esplicación oficial diz que en teoría, el petróliu tendría que conxelase y quedar ellí pa los restos, tolos colectivos ecoloxistes, encabezaos por Greenpeace, Adega y WWF-Adena denuncien que'l barcu ye una bomba mediuambiental y que la situación remanose de la manera más chapucera, dexándola agora al aldu de que los tanques del fuel nun acaben españando, que ye lo que temen agora bien de voces autorizaes, que siguen entrugándo por qué nun se fizo un tresvase a otru barcu cuando hubo tiempu pa ello. Hasta el ministru Matas reconoz que puede que'l desastre "entovía nun acabare"

El casu del petroleru Prestige valio tamién pa enraxonar a los portugueses, que contemplaron ablayaos como España quería carga-yos el problema. Esta páxina del canal portugués TSF resulta abondo interesante de ver al respective. El portal gallegu Vieiros, que güei abre con una portada en negro, inclúi estiespecial que recomendamos pa conocer más y que da enllaces tan interesantes como esti de la marina civil francesa con tolos datos del accidente