Foro y PP presentarán a los sos candidatos na sesión d’investidura

La derecha nun llega a un entendimientu sobre’l candidatu a presentar na sesión d’investidura. Mercedes Fernández anunció que diba a optar a la presidencia, mentes que Foro quier mantener nel puestu a Francisco Álvarez-Cascos.
 
Fernández preséntase "porque cree na fortaleza que-y otorga la so interlocución col Gobiernu d'España", y destacó qu'esta decisión nun s'adoptó en base a un alcuerdu con Álvarez-Cascos, sinón que yera una propuesta al so ex compañeru de partíu. Tres conocer la postura popular, la Comisión Direutiva de Foro de Ciudadanos aconceyóse pela tarde y decidió que tamién diben presentar candidatu na sesión d’investidura. Álvarez-Cascos anunció tres la reunión l’alcuerdu que plantegó a Fernández el vienres pasáu, qu’incluyía la presidencia de la Xunta Xeneral pa los populares y cuatro conceyalíes, quedando en manes de Foro cinco.
 
Entrugáu sobre lo qu’opinaba acerca del anunciu fechu por Fernández, el llíder de Foro nun quixo dar munches pistes al asegurar que "lo que yo veo y interpreto, guárdolo pa min", pa depués añadir que la so formación tien la "llexitimidá" de ser la fuercia mayoritaria ente les qu’apuesten pol cambiu n’Asturies. Por últimu, dixo que va siguir negociando colos populares: "Yo nun soi partidariu de colar de nenguna mesa negociadora, salvo que m’echen", afirmó.