Foro y PP negocien una candidatura conxunta pa les Estatales del 20-A

Primer alcuentru ente dambes formaciones, con valoraciones positives nes dos partes.

La propuesta, nacida dende'l Partido Popular (PP), busca una candidatura conxunta n'Asturies ente populares y Foro, col oxetivu de nun dividir el votu de la derecha nel país. La Comisión Direutiva de Foro aceptó aniciar les conversaciones, poniendo como "requisitos básicos el respetu al programa de Foro en defensa d'Asturies, l'autonomía municipal y rexonal de Foro, la independencia del discursu de Foro y l'adscripción de los parllamentarios eleutos al grupu que convenga a Foro", esplicó Cristina Coto, presidenta del partíu.

Güei celebróse'l primer alcuentru, cola presencia de Coto y el secretariu xeneral Francisco Álvarez-Cascos y el parllamentariu Pedro Leal, por Foro; y la presidenta Mercedes Fernández, el diputáu Luis Venta y l'asesor xurídicu Pedro Gorriz, pol PP. La valoración por parte de dambos frentes foi mui positivu, anque Coto apuntó que les conversaciones han de continuar.

Martínez Oblanca, candidatu

Pase lo que pase nes negociaciones col PP, el candidatu de Foro nes eleiciones al Congrersu del 20 d'avientu va ser Isidro Martínez Oblanca. El diputáu na Xunta Xeneral algamó'l 482 votos nes primaries de la formación celebraes el xueves, lo que supunxo un 68 por cientu del total. Mentes, l'asturianista Inaciu Iglesias, tuvo 206 apoyos (29 por cientu). Hebo 16 votos en blanco y 5 nulos.