Foro: sí a la oficialidá en Villaviciosa, non en Llaviana y "veremos" n'Asturies

La formación caltién una ambigüedá que queda reflexada nestes dos votaciones y nes declaraciones al rodiu'l dictame de la comisión d'asturianu na Xunta Xeneral.

Esti miércoles vivióse un episodiu nuevu de les duldes y ambigüedaes de Foro con respeuto a la oficialidá. Nel so programa eleutoral la formación afitaba que "sofitaremos, cuando se dean les circunstancies polítiques y el consensu social necesariu que permiten la reforma del nuesu Estatutu d'Autonomía, la modificación del so artículu 4 pa incluyir la oficialidá, tal como se recueye nel artículu 3.2 de la Constitución española". Sicasí ayeri'l diputáu Pedro Leal firmó una nota informativa coles aportaciones presentaes pa la Comisión Especial d’Estudiu sobre'l Réxime de Proteición y Promoción del Asturianu con dellos apuntes soprendentes y colo que paecía un pasu atrás na so defensa de la cooficialidá.

Asina, el parllamentariu criticó la escoyeta de les persones qu'acudieron a les comparecencies informatives al entender que "salvo el Decanu de la Facultá, José Antonio Gómez y l'especialista n'asturianu, Ramón d'Andrés, son persones afines a l'Academia de la Llingua Asturiana. Sólo un profesor asturianista, naide de Filología Española".  Lo chocante d'esti argumentu ye que los partíos podíen facer propuestes de comparecientes. Tamién afirmó que "el futuru del asturianu nun ta en discuti-y al castellanu los espacios de comunicación".

No que toca a les sos propuestes pide el desarrollu reglamentariu de la Llei d'Usu y la normalización y dignificación social del asturinau, buscando'l consensu más ampliu posible y respetando la voluntariedá del so usu y asegurando que nun hai torgues pal mesmu.

La propuesta de Foro enxértase nun momentu nel qu'esta formación ta recibiendo un ataque continuáu pol so apoyu a la oficialidá dende los medios y grupos de presión que tienen les postures más reaccionaries y involucionistes respeuto al asturianu, y nun contestu pre-eleutoral nel que la formación asturiana compite pol votu con Ciudadanos y PP, y fai por ello por estremase de les formaciones d'izquierda.

Nel puntu últimu, sicasí, fálase de que pa una hipotética reforma estatutaria qu'incluyere la oficialidá, tien de buscar un modelu propiu y supeditase a "que se dean les circunstancies polítiques y el consensu social necesariu".

Diferencies ente Llaviana y Villaviciosa

Al empar, ayeri votábase y aprobáse en dos conceyos una moción de sofitu a la oficialidá del asturianu na que s'instaba al Gobiernu y a los partíos con representación na Xunta Xeneral a entamar a un diálogu y llograr un consensu p'avanzar hacia una reforma del Estatutu, onde Foro tuvo dos postures estremaes dafechu.

En Villaviciosa, onde la propuesta llevaba'l matiz "na presente llexislatura", la edil María Ana López Montes amosó'l so apoyu nidiu a la equiparación de derechos de los asturfalantes y el so compromisu pa col idioma, como reflexa col so interés por deprender l'idioma acudiendo a les clases que pon el Serviciu de Normalización Llingüística de la 'Comarca de la Sidra'.

En Llaviana, el conceyal Borja Álvarez Sueiro, que sustituyó nel cargu a Adrián Pumares, respetuosu pa cola llingua asturiana, votó en contra de la moción interviniendo nel alderique con una actitú de burlla y d'ataque a los ediles de Somos Llaviana, formación que presentó la propuesta, afirmando que nun falen l'asturianu nin lo empleguen nos sos escritos. D'igual forma, minorizó l'idioma, asegurando que nun se pue poner al mesmu nivel que'l catalán o'l gallegu.

Na semeya: El dipatáu de Foro Pedro Leal na presentación en Xixón del Proyectu 2018 pola Oficialidá (Xixón, 23/09/17).